Барилгын томоохон компанийн захирлууд мэдээлэл хийлээ
Барилгын салбарт үйл ажиллагаа явуулдаг Гандирс ХХК-ийн захирал Ц.Эрдэнэчулуун, Орчлон Констракшн ХХК-ийн захирал Д.Ганзориг, Заг Констракшн ХХК-ийн захирал Г.Ононтуул, Цаст Констракшн ХХК-ийн захирал Н.Баярцэцэг, Грийн ресурс ХХК-ийн захирал Ц.Цэцэнзориг нар өнөөдөр хэвлэлийн бага хурал хийлээ.
Тэд Баянгол дүүргийн Төмөр замын 1-4 дүгээр хорооны нутаг дэвсгэрт орших дахин төлөвлөлтийг хийж, бүтээн байгуулах байгуулах Нийслэлийн Ерөнхий төлөвлөгөөний газраас зарласан уралдаан шалгаруулалтанд оролцох зорилгоор “Монголын бүтээн байгуулалтын түншлэл” консерциумыг байгуулан нэгдсэн ажээ.
“Монголын бүтээн байгуулалтын түншлэл” консерциумаас Төмөр зам орчмын барилгуудыг ахин төлөвлөж, цогц байдлаар бүтээн босгох төлөвлөгөөг гаргажээ.
Ингэхдээ 1,000 хүүхдийн сургууль, ногоон байгууламж, зам талбайн тохижилт, явган хүний гүүрэн гарц, гэрэлтүүлэг, ИШС-г шинэчлэх өргөтгөх зарим ажлыг төслийн хүрээнд хийхээр төлөвлөсөн юм байна.
Гэсэн хэдий ч уралдаант шалгаруулалт шударга бус явагдаж байна хэмээн үзэж байгаа аж. Ингэж үзэх болсон хэд хэдэн шалтгаан байгааг дурдаж байв.
Тухайлбал:
Төслийг сонгон шалгаруулах хугацаа дууссан байхад өнөөдрийг хүртэл албан ёсны хариу өгөөгүй ч зарим ялагчдыг зарлаж байгаа нь бусад хэвлэл мэдээллийн хэрэгслээр цацагдаж байна. Мөн төсөл хэрэгжүүлэх газрыг олон хэсэгт хуваан задалж, арваад жижиг төсөл болгосон нь хот төлөвлөлтийн эсрэг үйлдэл болсон. Түүгээр ч зогсохгүй албан ёсны хариуг өгөхдөө хуулийн хугацааг баримтлаагүй, хоцроосон бөгөөд ингэхдээ үл ойлгогдох, хардлага төрөхүйц агуулгатай хариулт бидэнд өгсөн хэмээв.
Гандирс ХХК-ний захирал Ц.Эрдэнэчулуун “Анх удаа туршлагатай барилгын компаниуд нэгдэж энэ төслийг хэрэгжүүлэхээр зорьсон. Төмөр замын том хорооллыг цогц хэлбэрээр, иж бүрнээр нь, гадаад орнуудад байдаг шиг босгох боломж байна.
Гэтэл энэ боломж хаагдаж мэдэх шинжтэй байгаа юм.
Энэ төслийг дэлхийн хэмжээнд хүрсэн төсөл гэж хэлж болно. Өнөөдөр бид Улаанбаатар хотод нүүрлээд буй эмх замбараагүй байдал, түгжрэл, орцгүй, гарцгүй байдал, уур уцаар, бухимдлыг шийдэх гэж энэ төслийг боловсруулсан. Энэ төсөлд олон төрлийн гайхамшигтай шинж багтаж байгаа. Жишээ нь олон улсын чанартай хүлээн авах газар болох Улаанбаатар төмөр замын төв буудлыг өөрчилж, угтах уур амьсгал оруулна. Мөн найрсаг, дэлхийн жишигт хүрч буй Улаанбаатарыг харуулахаар төлөвлөсөн ийм төсөл байгаа юм.
Хоёрдугаарт нийгмийн талаас цэцэрлэг, сургууль, эмнэлэг, үйлчилгээний газруудыг байгуулна. Энэ бүх асуудлыг норм стандартыг дагуу зохицуулахаар төсөлдөө оруулчихсан байгаа. Бид төсөлдөө мянган хүүхдийн цэцэрлэг үнэгүй, 500 хүүхдийн сургууль концепциор барьж өгөхөөр тусгасан.
Дэлхийн хэмжээний ийм том төслийг Нийслэлийн удирдлагуудад мэргэжлийн өндөр түвшинд танилцуулах хүсэлтээ албан бичгээр хэд хэдэн удаа илгээсэн хэдий ч хариу өгөөгүй байна.
Өнөөдрийн байдлаар энэ газрыг есөн задгай хороолол болгож, есөн өөр компани барих гэж байна. Хэрэв ингэх юм бол есөн өөр зорилготой компаниуд өөр өөрсдийнхөөрөө төлөвлөлтгүй, өөр чанартай, өөр хэлбэртэй, нийгмийн асуудлыг тооцоолоогүй хороолол барина. Жижигхэн газар авсан компани тэндээ аль болох их орон сууц барина гэж бодно. Энэ бол тэр компани муугаасаа биш, энэ асуудлыг хэрхэн зохицуулж байгаагаас шалтгаалж байна” гэсэн юм.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
