Улаан талбайд болох ёслолын жагсаалыг Улаанбаатар хотын төв дэлгэцүүдээр орчуулгатайгаар шууд дамжуулна

Эх орны дайны ялалтын 70 жилийн ой энэ онд тохиож байгаатай холбогдуулан ойг хэрхэн тэмдэглэх талаар Монгол Улсын Ерөнхийлөгчийн 2015 оны 01 тоот зарлиг, Монгол Улсын Засгийн газрын 85 дугаар тогтоол, Батлан хамгаалахын сайдын А/83 дугаар тушаал гарсан.

Үүнийг үндэслэн нийслэлийн Засаг дарга “Ой тэмдэглэх тухай” А/337 дугаар захирамж гаргаж, Чөлөөлөх дайны ялалтын 70 жилийн ойд бэлтгэх, тэмдэглэн өнгөрүүлэх ажлыг зохион байгуулах нийслэлийн салбар комиссыг баталж, Ахмад дайчдын гавьяа, зүтгэлийг алдаршуулан мөнхжүүлэх, амьдрал ахуйд нь туслах залуу хойч үеийнхний эх оронч – үндэсний үзэл, сэтгэлгээг төлөвшүүлэх  ажлыг зохион байгуулахыг дүүргийн Засаг дарга нарт, Чөлөөлөх дайны  70 жилийн ойд бэлтгэх, тэмдэглэн өнгөрүүлэх Засгийн газрын төлөвлөгөөтэй уялдуулан нийслэлд зохион байгуулах ажлын төлөвлөгөөг боловсруулан хэрэгжүүлэхийг нийслэлийн салбар комисст даалгасан.  

Уг ажлын хүрээнд өнөөдөр ялалтын 70 жилийн ойг хэрхэн тэмдэглэх талаар Батлан хамгаалах яамны Төрийн нарийн бичгийн дарга, хошууч генерал З.Болдбаатар, Батлан хамгаалах яамны Төрийн захиргааны удирдлагын газрын дарга Ж.Алтансүх, НЗДТГ-ын Цэргийн штабын дарга, хурандаа Ж.Болдбаатар нар сэтгүүлчдэд мэдээлэл өглөө.
 
Тавдугаар сарын 8-ны өдөр Их ялалтын 70 жилийн ойг угтсан Хүндэтгэлийн чуулга болон баярын концерт болох бөгөөд тавдугаар сарын 9-ний өдөр буюу Бямба гарагт Зайсан дахь Зөвлөлтийн дайчдад зориулсан хөшөө, Г.К. Жуковын нэрэмжит дурсгалын хөшөөнд цэцэг өргөх ёслол болох юм.  

Мөн Их эзэн Чингисийн талбайд цэргийн хээрийн гал зуух иргэдэд халуун хоолоор үйлчилж, баярын концертыг зохион байгуулах бөгөөд Москва хотын Улаан талбайд болох ёслолын жагсаалыг Улаанбаатар хотын төв дэлгэцүүдээр орчуулгатайгаар шууд дамжуулна.