Автотээврийн хэрэгслийн албан татварыг онлайн, мобайл банкаар төлж болно

Нийслэлийн ИТХ-ын Тэргүүлэгчдийн тогтоолын дагуу автотээврийн хэрэгслийн албан татвар төлөх, хураах ажлыг шинэ системээр явуулах болсон талаар мэдээлэл хийлээ.

Автотээврийн болон өөрөө явагч хэрэгслийг эзэмшиж байгаа хувь хүн, хуулийн этгээд албан татвар төлдөг. Хуульд хувь хүн автотээврийн болон өөрөө явагч хэрэгслийн албан татварыг жилд нэг удаа тухайн жилийн зургаадугаар сарын 01-ний дотор төлөх үүрэгтэй бол албан байгууллага, аж ахуйн нэгж эхний хагас жилээр албан татварыг төлөх ба жилийн албан татварыг урьдчилан төлөх боломжтой гэж заасан байдаг.

Улаанбаатар хотын Ерөнхий менежер Б.Бадрал “Үзлэг оношилгоо хуваарийн дагуу үргэлжилсээр байдаг ч манай иргэд тавдугаар сарын сүүлээр л бүгдээрээ автомашинаа оношилгоонд оруулах болж оношилгооны төвүүдийн ачаалал ихэсдэг.

Тиймээс Нийслэлийн Иргэдийн Төлөөлөгчдийн Хурлын Тэргүүлэгчдийн 2015 оны нэгдүгээр сарын 26-ны өдрийн 28 дугаар тогтоолоор “Нийслэлд автотээврийн хэрэгслийн бүртгэл, төлбөрийн тогтолцоог шинэчлэн нэвтрүүлэх журам”-ыг баталлаа.

Автотээврийн хэрэгслийн албан татвар, төлбөр хураах ажлыг улсын дугаарын сүүлийн тооноос хамаарч төлөхөөр зохицуулалт хийсэн.

Тодруулбал, жолооч таны автомашины улсын дугаар :

• 1, 6 тоогоор төгссөн бол нэгдүгээр сард
• 2, 7 тоогоор төгссөн бол хоёр дугаар сард
• 3, 8 тоогоор төгссөн бол гуравдугаар сард
• 4, 9 тоогоор төгссөн бол дөрөвдүгээр сард
• 5, 0 тоогоор төгссөн бол тав дугаар сард албан татвар, төлбөр хураамжаа төлнө.

Захирамжийн дагуу нэг, хоёрдугаар сард оношилгоонд орох байсан 1, 2, 6, 7-ын цифрээр төгссөн дугаартай машинууд энэ сарын үлдсэн хоногууд болон гуравдугаар сардаа багтаж оношилгоондоо хамрагдана.

Энэ жилдээ оноогдсон сард оношилгоондоо багтаж ороогүй тохиолдолд торгууль шийтгэл байхгүй хэдий ч иргэддээ заасан хугацаанд оношилгоондоо орж хэвшээрэй хэмээн уриалмаар байна” гэлээ.

Иргэд автомашины улсын дугаараас хамаараад саруудад хуваагдан татвараа төлөх нь хугацаа дуусахаас өмнө банкууд, оношилгооны цэгүүдэд үүсдэг дараалал, ачааллыг бууруулах юм байна.

Нийслэлийн татварын газрын Татвар хураалтын хэлтсийн дарга Б.Батболд “Манай байгуулагын зүгээс иргэдийн татвар төлөх нөхцөлийг хөнгөвчлөх талаар олон ажлыг зохион байгуулж байгаа.

Өмнөх жилүүдэд зөвхөн Улаанбаатар банк оношлогооны цэгүүд дээр байршин үйл ажиллагаа явуулдаг байсан бол Ухаалаг Улаанбаатар хөтөлбөрийн хүрээнд “Smartcar” мэдээллийн системийн хэрэглээг өргөжүүлж, нийслэлд бүртгэлтэй, идэвхтэй тээврийн хэрэгслийн нэгдсэн санг үндэслэн нийслэлийн Мэдээллийн технологийн газар, Татварын алба арилжааны банкуудтай хамтран автотээврийн хэрэгслийн албан татвар, төлбөрийг онлайн, интернет, мобайл банкаар шууд төлдөг тогтолцоонд шилжүүлснээр иргэд аль ч нөхцөлөөр төлөх боломжийг бүрэн хангасан" гэлээ. 

Энэ жилээс автотээврийн хээргслийн бааз цэгцлэх ажлыг зохион байгуулж, эвдэрсэн, цаашид ашиглах боломжгүй болсон автотээврийн хэрэгслийг улсын бүртгэлээс хасах үйл ажиллагааг хялбаршуулсан байдлаар хийх юм байна. Ингэхдээ олон жил оношилгоонд ороогүй эвдэрсэн автомашиныг торгуульгүй оношилгоонд оруулах ажээ.

АТБӨЯХ-ИЙН АЛБАН ТАТВАР, АГААРЫН БОХИРДЛЫН ТӨЛБӨР, АВТОЗАМ АШИГЛАСНЫ ТӨЛБӨР ХУРААХ НЭГ ЦЭГИЙН ҮЙЛЧИЛГЭЭНИЙ БАЙРШИЛ