Хятадад төрөлт эрс өсчээ
БНХАУ-д энэ онд хүүхдийн тоо эрс өсчээ. Тус улсын эрх баригчид хятад үндэстэн хөгширч байгаа тул “Нэг гэр бүлд нэг хүүхэд” хэмээх хатуу бодлогоо зөөлрүүлсэн билээ.
Түүнчлэн энэ онд Хятадад амаржсан эхчүүд болон шинээр төрсөн хүүхдэд хэрэгтэй бараа, бүтээгдэхүүний худалдаа эрс нэмэгдэж, интернэт худалдан авалт 35 хувиар өссөн байна.
БНХАУ-д төрөлт эрс өссөн нь хоёр учиртай гэнэ
Нэгдүгээрт, хатуу бодлого зөөлөрснийх,
Хоёрдугаарт, морь жил хятадуудын хувьд билэгдэлтэй, ээлтэй сайн жил байдаг аж. Тиймээс элдэв ёс заншилд итгэмтгий хятад иргэд ивээл муутай хонь биш, морь жилд хүүхэдтэй болохыг илүүд үзжээ.
Бээжин хотын иргэн Сай Жияу хэлэхдээ “Хоёр хүүхэдтэй болох нь бидэн шиг залуу гэр бүлд сайн боллоо. Ганц хүүхэд амиа хичээдэг хүн болж төлөвшдөг. Тиймээс бид энэ жил хоёр дахь хүүхэдтэй болохоор төлөвлөсөн” гэв.
Гуандун мужид жирэмсэн эмэгтэйчүүд олноор тааралддаг болжээ. Энэ оны гуравдугаар сард хоёр дахь хүүхдийг төрүүлж болдог шинэ журмыг гаргаснаар тус мужийн төрөх эмнэлгүүдэд ор олдохоо больсон байна. Тиймээс төрөх эмнэлгүүдэд 40 ор нэмж тавьжээ.
Мөн хоёр дахь хүүхдээ төрүүлэх гэж буй эхчүүд хугацаа нь болоогүй байхад урьдчилан захиалга өгдөг болсон байна.
“Нэг гэр бүлд нэг хүүхэд” бодлого Хятадад хөгшин хүний тоо маш ихээр нэмэгдэхэд хүргэжээ.
“Нэг гэр бүлд нэг хүүхэд” бодлого Хятадад хөгшин хүний тоо маш ихээр нэмэгдэхэд хүргэжээ.
Түүнээс гадна гэр бүлүүд үр удмаа үргэлжлүүлэхийг хүсч хүүтэй болохын тулд эмэгтэй хүүхэд байвал аборт хийлгэдэг болсон билээ.
Түүний улмаас тус улсад хүйсийн тэнцвэртэй байдал алдагдаж, арван жилийн дараа гэхэд 30 сая харчуудад эхнэр олдохгүй байх аюул тулгараад байна.
Өнөөдөр Хятадад 30 насны ганц бие эрчүүдийн ихэнх хувь нь эрх өссөн айлын ганц хүү аж. 2050 он гэхэд БНХАУ-д дөрвөн хүн тутмын нэг нь тэтгэврийн хүмүүс байх болно хэмээх судалгаа гарчээ.
