"Нарантуул", "Барс"-ын төмөр чингэлэгт явуулж буй хүнсний худалдааг хэсэгчлэн зогсоожээ

НМХГ-аас Хүнсний чанар, аюулгүй байдлын хяналтын болон эрүүл ахуй, халдвар хамгаалалд  хяналт шалгалт хийжээ.

Шалгалтад  “Хархорин”,”Энхжин”, “Юмт бөмбөгөр”, “Эрдэнэбулган”, “Меркури”, “Нарантуул”, “Барс” зэрэг долоон худалдааны төв, 980 гаруй лангуу түрээслэгч иргэдийг хамруулсан байна.

Шалгалтанд хамрагдсан зах, худалдааны төвүүдэд

• Шошгын шаардлага хангаагүй импортын хүнс болон хаяг, шошго, сав, баглаа боодолгүй
• Хадгалалтын хугацаа дууссан түүхий эд, хүнсний нэмэлт, хүнсний бүтээгдэхүүн болон эрүүл мэндийн зурагт анхааруулгад тавигдах шаардлагыг зөрчсөн 
• Импортын янжуур тамхи, онцгой албан татварын тэмдэггүй, Монгол улсад худалдан борлуулахыг зөвшөөрсөн тэмдэглэгээгүй, импортлогч нь тодорхой бус дүнсэн тамхи худалдаалж байгаа 
• Хүнсний түүхий эд, бүтээгдэхүүний ул мөрийн мөрдөн тогтоох бүртгэл хөтлөөгүй зөрчил, дутагдлууд нийтлэг илэрчээ.

“Нарантуул Трейд” ХХК-ий “Нарантуул” захын өргөтгөлийн хэсэгт байрлах хүнсний худалдаа, “Барс-Импекс” ХХК-ий “Барс” худалдааны төвийн төмөр чингэлэгийн хүнсний худалдааны үйл ажиллагааг энэ сарын нэгнээс эхлэн зөрчил арилгах хүртэл хугацаагаар хэсэгчлэн түр зогсоохоор болжээ.

Зөрчилтэй хүнсний бүтээгдэхүүнүүд

 Захуудад илэрсэн нийтлэг зөрчлүүд:

• Байгаль орчинд нөлөөлөх байдлын үнэлгээ хийлгээгүй
• “Хүнсний бөөний агуулах” гэж нэрийдсэн халаалтгүй, усан хангамжгүй, гэрэлтүүлэггүй худалдааны павилонууд нь хүнсний агуулахын стандартын шаардлага хангахгүй, тоос шороотой, улирлын температураас хамааран хүнсний болон ахуйн хэрэглээний бүтээгдэхүүн хэт халж, хөлдсөнөөс чанар, аюулгүйн үзүүлэлт өөрчлөгдөн хүний эрүүл мэндэд сөрөг нөлөө үзүүлж болзошгүй байгаа
• Худалдаа эрхлэгчид эрүүл мэндийн урьдчилан сэргийлэх үзлэгт бүрэн хамрагдан, магадлагаа гаргуулаагүй 
• Хүнсний чиглэлийн үйл ажиллагаа эрхлэгчдэд хүнсний аюулгүй байдал, эрүүл ахуй, ариун цэврийн талаар сургалт зохион байгуулдаггүй, тэдний хууль эрх зүйн мэдлэг дутмаг 
• Захын нийт эдэлбэр газар нь хатуу, шингэн хог хаягдлаар бохирдсон, дотоодын хяналт, шалгалтын үр дүн хангалтгүй, өмнө тавьсан мэргэжлийн хяналтын байгууллагын шаардлагыг бүрэн хэрэгжүүлж ажиллаагүй 

НМХГ-ын дэд дарга М.Баасандорж “Шошгын зөрчилтэй 171 нэрийн бүтээгдэхүүнийг хүнсний сүлжээнээс татан авахуулж, зөрчлийг арилгуулсан.

Мөн хүнсний бүтээгдэхүүний ул мөрийг мөрдөн тогтоох бүртгэлгүй, баталгаажилтгүй худалдаалагдаж байгаа 59 нэрийн хүнсний бүтээгдэхүүнээс дээж авч НМХГ-ын болон МХЕГ-ын Хүнсний Үндэсний лавлагаа лабораторид шинжилгээнд хамруулж байгаа. Шинжилгээний дүн гараагүй байна” гэлээ.