"ХУР дагуулан ирсэн мөнгөн цагаан ХӨЛГИЙГ манай нутаг тосон авч байна"

“Аэро Монголиа” компани Оюу Толгой уурхайн чиглэлд нислэгтэй боллоо.  

"Ханбумбат" нисэх буудал өчигдөр анхны арилжааны нислэгээ хүлээн авлаа.  "Аэро Монголиа" компани Улаанбаатараас Өмнөговь аймгийн Ханбогд суманд байрладаг тус нисэх буудал руу долоо хоногт хоёр удаа нислэг үйлдэхээр шийдвэрлэжээ.

Анхны нислэгээр ирсэн төрийн өндөр албан тушаалтнууд, бизнесийн төлөөлөгчид Говь нутагт анх удаа олон улсын стандартад нийцэхүйц баригдсан нислэгийн зурвас замд бууж тусгай нээлтийн ёслолын арга хэмжээнд оролцсон юм.

Голланд улсад үйлдвэрлэсэн, 50 хүний суудалтай “Фоккер-50” онгоцоор үйлчлэх энэхүү шинэ нислэгийн нээлт нь уурхайн дэд бүтцээ орон нутгийн ард иргэдтэй хамтран ашиглах Оюу Толгойн хэтийн зорилтод хүрэхэд томоохон ахиц гарсныг харуулж байна.

Улаанбаатар -Ханбогдын тогтмол нислэгийн нээлтийн арга хэмжээ, "Ханбумбат" нисэх буудал

• “Аэро Монголиа” компанийн гүйцэтгэх захирал У.Сагамдолдой ”Манай компани анхны нислэгээ үйлдсэнээс хойш 11 жил өнгөрч байна. Манайх Оюу Толгой төслийг анх эхэлснээс хойш өнөөг хүртэл агаарын тээврийн үйлчилгээ үзүүлж байгаагаараа үнэхээр их бахархдаг. Оюу Толгой төслийн ачаар өмнийн говь руу нисэх зорчигчийн тоо ихээхэн нэмэгдэж байна. Үүнтэй уялдаад нислэгийн шинэ чиглэл нээгээч гэсэн хүсэлтийг орон нутгийн удирдлага, ард иргэд олонтаа тавьдаг байсан тул “Ханбумбат” нисэх онгоцны буудал баригдаж бид энэхүү хүсэлтийг биелүүлэх боломжтой болсонд баяртай байна” гэлээ.

“Аэро Монголиа” компани нь өнөөдрийн байдлаар 130 гаруй ажилтантай, орон нутгийн 10 чиглэлд, олон улсын хоёр чиглэлд тогтмол нислэг үйлдэж байна. 

Улаанбаатараас Ханбогдын энэхүү тогтмол нислэгийн үйлчилгээ бий болсноор зөвхөн Ханбогд сумын иргэдээр хязгаарлагдахгүй ойролцоох Манлай, Баян-Овоо, Цогтцэций сумын иргэд болон Оюутолгой компанийн туслан гүйцэтгэгч компанийн ажиллагсад үйлчлүүлэх боломжтой болж байна.

Улаанбаатараас Ханбогд сум хүртэл 650 гаруй км. Нутгийн иргэд болон зорчигчид өмнө нь автомашинаар 10 цаг орчим явдаг байсан бол одоо онгоцоор ердөө 1 цаг 30 минут ниснэ. 

• Нээлтийн ёслолд оролцсон Оюу Толгой ХХК-ийн Үйл ажиллагаа хариуцсан дэд захирал Айвен Велла “Хоёр жилийн өмнө бид "Ханбумбат" нисэх буудлыг барьж байхдаа өнөөдөр шиг өдрийг л мөрөөдөж байлаа. Бид “Ханбумбат” нисэх буудлыг уурхайн ажилчид, тэдэнд үйлчлэгчдийг тээвэрлэх зорилгоор барьсан. Гэхдээ бүс нутгийн дэд бүтцийн энэхүү чухал хэсгийг бид хамтран ашиглаж, орон нутгийн иргэдэд ч бодит ашиг шим өгнө гэсэн санаа бидэнд анхнаасаа байсан юм” гэв.

Улсын нийслэлтэйгээ дөт замаар холбогдсонд нутгийн иргэд тун баяртай байна.

• Ханбогд сумын Засаг дарга Т.Буян-Өлзий  "Манай нутгийн 80 гаруй хувьд гандуу байна. Тиймээс ч малчид хувиараа бизнес эрхлэх жижиг дунд үйлдвэрээ хөгжүүлэх тал дээр их анхаарч байна. Сүү цагаан идээ боловсруулах зэрэг хөдөө аж ахуйн бизнесээс гадна бетон зуурмагийн үйлдвэр зэрэг барилгын материал үйлдвэрлэх бизнес эрхэлж байна. Улаанбаатар-Ханбогдын хооронд тогтмол нислэгтэй болсон нь манай нутгийн иргэдийн амжиргаанд ч ихээхэн нэмэртэй юм. Цаг хугацаа хэмнэх мөн манай нутгийг зорин ирэх жуулчдын тоо нэмэгдэх, нислэгийн компани орон нутагт татвар төлөх зэрэг эдийн засаг, санхүүгийн олон ач холбогдолтой" гэлээ. 

Ханбогд сумд аялал жуулчлалын чиглэлээр олон сонирхол татахуйц цэгүүд бий. 

Дэмчогийн хийд, палеонтологи, археологийн олдворууд, зэрлэг ан амьтад, байгалийн үзэсгэлэнт газрууд зэрэг аялал жуулчлалын олон сонирхолтой хөтөлбөрүүдийг жуулчдад санал болгодог. Энэ чиглэлээр ч нутгийн иргэд идэвхтэй ажиллаж байна. Аялал жуулчлалын энэхүү сонирхолтой хөтөлбөрүүдийг идэвжүүлэхэд тус орон нутгийг чиглэсэн тогтмол нислэг үнэхээр чухал үүрэгтэй юм. 

Улаанбаатараас Ханбогд руу хийх тогтмол нислэгийн анхны зочдыг "Хамбумбат" нисэх буудалд өчигдөр газардах үед газар орны тэнгэр баярлаж хур бороогоо хайрласан юм. 

Улаанбаатар -Ханбогдын тогтмол нислэгийн нээлтийн арга хэмжээ, "Ханбумбат" нисэх буудал

• Ханбогд сумын өндөр настан Х.Амбаа гуай "ХУР дагуулан ирсэн мөнгөн цагаан ХӨЛГИЙГ манай нутаг тосон авч байна. Нутгийг маань улсын нийслэлтэй холбосон тогтмол нислэгтэй болгосон “Аэро Монголиа” компанид баярлалаа" гэсэн юм. 

“Аэро Монголиа” компанийн энэхүү тогтмол нислэгийн нээлт ахмадын өдөртэй таарсан тул энэ сарын турш ахмадуудад 50 хувийн хөнгөлөлттэй, нийт зорчигчдод 30 хувийн хөнгөлөлтэй үйлчлүүлэх шийдвэр гаргасан юм. 

"Ханбумбат" нисэх буудал

Ханбумбат - Улаанбаатар хоорондын чиглэлийн нислэгийг долоо хоногт хоёр удаа Лхагва болон Бямба гарагт хийнэ. "Аэро Монголиа" компани Ханбогд сумд билетийн касс болон төлөөлөгчийн газраа нээгээд байна. 

Монголчууд зам дагаж хөгжил ирдэг гэдэг. Тэгвэл нийслэлээс 650км зайд орших өмнийн говийн Ханбогд сумыг Улаанбаатартай холбосон энэхүү агаарын зам тус газар оронд төдий чинээ хурдтайгаар хөгжлийг түгээх биз ээ.