41 дэх олимпиад монголчуудын ялалтаар эхэллээ

Норвегийн Тромсө хотод Олон улсын шатрын холбооны 41 дэх олимпиад эхэллээ. Энэ удаагийн тэмцээний эрэгтэйчүүдийн ангилалд 172 орны 177 баг, эмэгтэйчүүдийн ангилалд 131 орны 136 баг өрсөлдөж буй нь дээд амжилт юм.

Олимпиадын эхний өргийн тоглолтууд манай цагаар наймдугаар сарын 2-3-нд шилжих шөнө болж, Монгол Улсын эрэгтэй, эмэгтэйчүүдийн шигшээ баг аль аль нь анхны ялалтаа байгуулав.

Эрэгтэйчүүдийн ангилалд тэмцээний чансааны 59 дүгээр байрт бичигдсэн Монгол Улсын шигшээ баг 145 дугаарт эрэмбэтэй Саудын Арабыг 4:0-ээр хожлоо.

1. Их мастер Ц.Батчулуун Абдулрахман А Маршиг
2. Их мастер Б.Хатанбаатар Эмад Аль-Хабибыг
3. Их мастер Б.Гүндаваа Хассан С Аль-Мунтариг
4. Олон улсын мастер Г.Мөнхгал Хамуд Аль-Ньерийг буулган авч, олон улсын мастер Н.Баттулга өнжсөн юм.

Манайхан хоёрдугаар өргийн тоглолтоо чансааны гуравдугаар байрт эрэмбэтэй Францын шигшээ багийн эсрэг урьд шөнө хийсэн.

Олон улсын мастер Б.Мөнгөнтуул

Эмэгтэйчүүдийн ангилалд тэмцээний чансааны 28 дугаар байрт бичигдсэн Монгол Улсын шигшээ баг 95 дугаарт эрэмбэтэй АНЭУ-ыг 4:0-ээр хожлоо.

1. Их мастер Т.Батчимэг олон улсын мастер Холуд Эсса Аль-Заруниг
2. ОУШХ-ны мастер Б.Баярмаа олон улсын мастер Амна Нуманыг
3. ОУШХ-ны мастер У.Лхамсүрэн Аиша Аль-Заруниг
4. Олон улсын мастер Б.Анхчимэг Али Абирыг буулган авч, эмэгтэйчүүдийн олон улсын мастер Б.Мөнгөнтуул өнжсөн юм.

Манайхан хоёрдугаар өргийн тоглолтоо чансааны есдүгээр байрт эрэмбэтэй Францын шигшээ багийн эсрэг урьд шөнө хийсэн.