АНУ-ын Дэд Ерөнхийлөгч Украйнд айлчиллаа
АНУ-ын Дэд Ерөнхийлөгч Жозеф Байден Киев хотноо Украйны Ерөнхий сайд Арсений Яценюктэй өчигдөр уулзсан тухай РИА Новости мэдээлэв.
Уулзалт орон нутгийн цагаар 11.00-д эхлэх байсан ч Ж.Байден 50 минут хоцорсон аж. Учир нь өмнө нь Украийны Ерөнхийлөгчийн үүрэг гүйцэтгэгч Александр Турчиновтой хийсэн түүний яриа хэлэлцээ сунжирсан байна.
Улстөрчид хаалттай хаалганы цаана уулзалт хийж байгаа бөгөөд дараа нь хэвлэлийнхэнд хамтарсан мэдэгдэл хийх юм. Ж.Байден өнгөрсөн даваа гарагт Украйнд хоёр хоногийн айлчлалаар очсон аж.
Тэрбээр Киевт эрчим хүчний салбарт техникийн туслалцаа үзүүлэх талаар ярилцахаас гадна Украйны зүүн хотуудын нөхцөл байдал, Үндсэн хуулийн шинэчлэлт, засаг захиргааг төвлөрүүлэн удирдахыг багасгах зэрэг асуудлыг хэлэлцсэн.
Ж.Байден Украйнд хамгийн их тулгамдаж байгаа асуудал бол шинэ удирдлагуудыг авлигаас хол байлгах гэжээ. Хэрвээ шинэ удирдагчид авлига, хээл хахуульд автаж эхэлбэл улстөрийн систем сүйрнэ хэмээн сануулсан аж.
АНУ-ын Дэд Ерөнхийлөгч Ж.Байден барууны үзэл баримтлалтай Украйны Засгийн газрыг дэмжиж байгаа гэдгээ парламентын гишүүдэд хэлсэн бөгөөд “Нэгдсэн Украйн улсыг байгуулахад та бүхний хүчин чармайлт хамгаас чухал” гэжээ.
