ГХЯ-ны нээлттэй өдөрлөгт долоон ЭСЯ үйл ажиллагаагаа танилцууллаа
Гадаад харилцааны яамны үйл ажиллагааг олон нийтэд сурталчлах “Нээлттэй өдөрлөг” өнөөдөр Чингисийн талбайд боллоо.
“Нээлттэй өдөрлөг”-ийг Гадаад харилцааны сайд Л.Болд нээж үг хэлсэн.
Өдөрлөгийн үеэр ГХЯ-ны газар нэгжүүд болон Улаанбаатар дахь Франц, Турк, Казахстан, Вьетнам, Лаос, Кувейт, Хятад зэрэг орнуудын Элчин сайдын яамд оролцож, өөрсдийн үйл ажиллагааг танилцуулан, иргэдийн сонирхсон асуултад хариулт өглөө.
Мөн ГХЯ-ны Консулын газраас иргэдэд виз мэдүүлэх болон гадаадад зорчихтой холбоотой зөвлөгөө өгч, нотариатын үйлчилгээ үзүүлсэн юм. Үүнээс гадна иргэдийг Бээжин, Сөүл, Бангкок, Хонгконгд суугаа Монгол Улсын Дипломат төлөөлөгчийн газруудтай холбож, сонирхсон асуултдаа хариулт авах боломжоор хангав.
Түүнчлэн, энэ үеэр Гадаад харилцааны төв архивын үзэсгэлэн гарч, архивтай холбоотой үйлчилгээ үзүүлсэн бөгөөд Дипломат ёслолын албанаас дипломат ёслолын талаар танилцуулга хийн, мэдээлэл өгөв.
Мөн өдөрлөгт ЮНЕСКО-гийн Монголын Үндэсний комисс оролцож, дэлхийн биет бус соёлын өвд бүртгэгдсэн морин хуур, уртын дууны тоглолт сонирхууллаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
