САЙН МЭДЭЭ: Техникийн захууд ГОЁ байранд нэг дор төвлөрөх нь

Өнөөдрийн байдлаар Улаанбаатар хотын 25 га талбайд автомашин, техник, сэлбэгийн худалдаа эрхэлдэг:

1. Да хүрээ
2. Өгөөмөр
3. Техник импортын зах
4. Дизель хүрээ
5. Цахлай
6. Дако
7. Буян  хурах
8. Сутай буянт ХХК зах ажиллаж байгаа.

Ойролцоогоор 8000 орчим түрээслэгчтэй эдгээр захаар өдөрт 6000-10000 хүн үйлчлүүлдэг. Эдгээр зах руу чиглэсэн замын хөдөлгөөн их байдаг.

Тиймээс өнгөрсөн оны аравдугаар сард СХД-ийн 32-р хорооны нутаг дэвсгэрт /Бидний нэрлэж заншсанаар 22-ын товчоо/130 га газарт “Авто худалдааны цогцолбор” байгуулж эдгээр захуудыг нэгтгэхээр Нийслэлийн удирдлагууд шийдвэрлэсэн билээ. Энэ дагуу шинээр баригдах цогцолборын хэсэгчилсэн ерөнхий төлөвлөгөөг гаргажээ.  

“Авто худалдааны цогцолбор”-ын бүтэц

• Сэлбэг, хэрэгслийн 285 павилон, 11 мянга 324 суудлын болон жийп автомашины худалдаа, 1 мянга 191 автобус, хүнд даацын автомашины худалдаа эрхлэх талбай
• Авто эскпо явагдах цогцолборын  1 барилга
• Үйлчилгээ оффисын 14 барилга
• 42 км авто зам
• 8,7 га талбайд явган хүний зам
• 1 мянга 438 авто машины үйлчлүүлэгчдийн зогсоол
• 36,7 га талбайд цэцэрлэгт хүрээлэн, ногоон байгууламж
• 4.4 га талбайд авто машины туршилтын талбай байхаар төлөвлөсөн байна.

Мөн 22-ын товчооноос 1,3 км зайд нийтийн тээврийн эцсийн зогсоол байршуулах боломжтой аж. Цогцолбороор үйлчлүүлэх иргэдэд зориулан Улсын дугаарын тоо бүртгэлийн газрыг Авто худалдааны төвд барих оффисын барилгад байршуулахаар төлөвлөсөн байна.

ТАВАН жилийн хугацаанд цогцолборыг бүрэн ашиглалтад оруулна. Эхний ээлжинд энэ жилийн наадмаас өмнө 14 000 автомашины талбай бүхий газрыг хатуу хучилттай болгож ашиглалтад оруулах юм байна.

Наадмаас өмнө 14000 автомашины талбай бүхий газрыг хатуу хучилттай болгож "Авто худалдааны цогцолбор"-ын нэг хэсгийг ашиглалтад оруулна.

Эдгээр зогсоолуудыг аж, ахуйн нэгж иргэдэд тогтоосон төлбөртэйгээр эзэмшүүлнэ. Зогсоолын хэмжээнээс шалтгаалан иргэн, аж ахуйн нэгжүүдэд худалдах үнэ нь 4-9 сая төгрөг байх гэнэ. 

Зогсоол худалдсан орлогоороо Авто худалдааны цогцолборын бусад бүтээн байгуулалтын ажлыг эхлүүлэх юм байна. Авто худалдааны чиглэлээр зохих журмын дагуу үйл ажиллагаа явуулж байгаа иргэн, аж ахуйн нэгжүүдэд шинэ цогцолборт  давуу эрхээр зогсоол эзэмшүүлэхээр төлөвлөжээ.

НИТХ-ын Тэргүүлэгчдийн ээлжит хуралдаан өнөөдөр боллоо /2014.02.20/

Авто худалдааны цогцолборын хэсэгчилсэн энэ ерөнхий төлөвлөгөөг өнөөдөр баталлаа. Мөн Авто худалдааны төвийн ашиглалт, үйл ажиллагааг хариуцах орон нутгийн өмчит аж ахуйн тооцоот үйлдвэрийн газрыг байгуулсан.

Авто худалдааны цогцолбор орон нутгийн өмчит аж ахуйн тооцоот үйлдвэрийн газар нь өөрөө өөрийгөө санхүүжүүлэн үйл ажиллагаагаа явуулна.