Энэтхэгийн ерөнхий сайд Украины дайныг дуусгахыг Оросын ерөнхийлөгчид уриалжээ
Даваа гарагт Шанхайн Хамтын Ажиллагааны Байгууллагын дээд хэмжээний чуулганы үеэр Энэтхэгийн ерөнхий сайд Нарендра Моди, ОХУ-ын ерөнхийлөгч Владимир Путин нар уулзжээ.
Энэ үеэр Моди тав дахь жилдээ үргэлжилж буй Украины дайныг дуусгахыг Путинд уриалсан байна.
“Энэтхэг улс энэ бүс нутагт энх тайван тогтоох бүх хүчин чармайлтыг дэмжиж байгаа бөгөөд цаашид ч үргэлжлүүлэн дэмжих болно. Бид төгсгөлгүй дайнаас дайныг зогсоох үе шат руу шилжих ёстой. Дайн үргэлжилж буй өдөр бүр хүн төрөлхтөн нэг алхам ухарч байна” гэж Моди хэлжээ.
Энэ сарын сүүлээр АНУ-ын төлөөлөгчдийн танхим сенатор агсан Линдси Грэмд хүндэтгэл үзүүлэх хуулийн төслийг батлах төлөвтэй байгаа.
Энэ хууль нь Хятад, Энэтхэг зэрэг Оросын газрын тосыг худалдаж авдаг гол таван улсын бараа бүтээгдэхүүнд 100 хүртэл хувийн импортын татвар ногдуулах зорилготой юм.
Тиймээс Украины дайн Энэтхэгийн эдийн засагт ноцтой дарамт шахалт учруулж байгаа.
Орос улс одоогоор Энэтхэгийн хамгийн том түүхий газрын тос нийлүүлэгч юм. Өнгөрсөн зургаа, долдугаар саруудад Энэтхэгийн газрын тосны импортын 50 хувийг Орос улс эзэлсэн бол наймдугаар сарын эхний 24 хоногийн байдлаар бараг 43 хувийг нийлүүлээд байна.
Хамгийн сүүлийн тоо баримтаар бол энэ оны дөрөвдүгээр сараас долдугаар сарын хооронд Энэтхэг улс $34 тэрбумын үнийн дүнтэй газрын тос ОХУ-аас импортолсон нь өнгөрсөн оны мөн үеэс бараг 60 хувиар өссөн үзүүлэлт болжээ.
Модитой уулзахдаа Путин хоёр улсын худалдааны хэмжээ өсөж байгааг сайшаасан ч өнгөрсөн онд “бага зэрэг” буурсныг дурдсан байна.
Үүнд Трампын засаг захиргааны худалдааны бодлого нөлөөлсөн байх магадлалтай. 2025 оны наймдугаар сард Трампын засаг захиргаа Оросын газрын тосыг худалдаж авсны шийтгэл болгон Энэтхэгийн бараа бүтээгдэхүүнд 25 хувийн нэмэлт татвар ногдуулснаар АНУ-д гаргадаг экспортын бүтээгдэхүүний нийт татвар нь 50 хувьд хүрсэн юм.
Одоо АНУ-ын эрх баригчид Венесуэлээс олборлосон газрын тосоо Энэтхэгт нийлүүлэх замаар Оросын зах зээлийг булаах зорилготой байгаа гэж ажиглагчид үзэж байна.
Эх сурвалж: Reuters
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
