Г.Түмэндэмбэрэлийн дууг хэн сайн дуулах вэ уралдаан болно
Монголын ятгын холбооноос “Ардын жүжигчин Г.Түмэндэмбэрэлийн дууг хэн сайн ятгатай дуулах вэ” нэртэй ятгатай дуулаачдын улсын анхдугаар уралдааныг зохион байгуулах гэж байна.
Тус холбооныхон өөрийн гэсэн өвөрмөц өнгө төрх, ятга хөгжимтэй дуулах авьяастныг тодруулан урлагт хөл тавихад нь туслах аж. Түүнчлэн ятгатай дуулдаг сайн дуучдын орон зай нь сул байна гэдгийг зохион байгуулагчид хэлж байв. Тиймээс заавал мэргэжлийн дуучин гэлтгүй сонирхсон хүн бүрт оролцох боломж олгож байгаа аж. Гурван үе шаттай явагдах тус тэмцээний эцсийн дүн зургаадугаар сарын 12-нд гарах бөгөөд оролцогчдын бүртгэл өчигдөр эхэлсэн.
Уралдаанд оролцогчдод ятгын холбооноос зөвлөгөө авах боломж ч бий аж. Тэмцээний шагналын сан таван сая төгрөг бөгөөд түрүүлсэн дуучныг цаашид урлагийн талаас нь бүх зүйлээр нь дэмжих гэнэ.
Түүнчлэн тус холбооныхон нэвтрүүлгийн төсөл бэлтгэн телевизүүдэд хандсан бөгөөд цувралаар нэвтрүүлэн бэлтгэн цацах аж. Мөн Монголын радиотой хамтран уралдааныг орон даяар дамжуулах юм байна.
Дашрамд дуулгахад 1960 оноос 1990 он хүртэл Г.Түмэндэмбэрэл, П.Адарсүрэн, Б.Энхбат, Ц.Өлзий-Орших, Д.Мөнхбаяр нарын бахдам дуучид байсан бол тэр цагаас хойш ятгатай дуулдаг чадварлаг дуучдын түүчээ тасраад 20 гаран жил болж байгаа гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
