Улсын арслан Б.Орхонбаяр хоёрын даваанд уналаа
Сар шинийн баярт зориулсан үндэсний бөхийн барилдаан нэгийн даваанаасаа эхлээд дуулиантай үргэлжилж байна.
Дархан аварга А.Сүхбат, улсын аварга П.Бүрэнтөгс, улсын гарди Ө.Бат-Орших, улсын заан Б.Бат-Өлзий, Д.Баасандорж тэргүүтэй бөхчүүд нэгийн даваанд унасан юм.
Тэгвэл хоёрын даваанд улсын арслан Б.Орхонбаяр сумын заан Д.Мөнхтулгад өвдөг шорооджээ. Сумын заан Д.Мөнхтулга нь нэгийн даваанд улсын заан Б.Бат-Өлзийг давсан билээ.
Завхан аймгийн Эрдэнэхайрхан сумын харьяат, "Хилчин" спорт хорооны тамирчин Д.Мөнхтулга нь улсын харцага М.Дармаабазарын хүү юм. 1992 онд улсын заан Ж.Ганболдоор зургаа давж, тухайн үедээ улсын өсөх идэр начин цолд хүрч байсан М.Дармаабазар хожим буюу 2004 онд хуульд өөрчлөлт оруулснаар улсын харцага цолтой болсон юм.
Дархан аварга А.Сүхбатыг нэгийн даваанд хаясан залуу бөх А.Энхбаяр хоёрын даваанд дархан аварга Н.Батсуурьтай оноолт таараад унав. Харин улсын арслан Ц.Содномдорж сумын заан М.Өсөхбаярт унасан байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
