Шинийн 3-нд буюу 20-ноос баруун хагаст, 21-нд ихэнх нутгаар хүйтний эрч эрс чангарч цасан шуургатай байна
Хоёрдугаар сарын 17-19-ны өдөр буюу битүүн, шинийн 1,2-ны өдрүүдэд ихэнх нутгаар цас орохгүй, цаг агаар тогтвортой, салхи шуурга багатай хүйтний эрч сулавтар, өдөртөө дулаахан байх юм байна.
Харин шинийн 3-наас буюу 20-нд баруун хагаст, 21-нд ихэнх нутгаар хүйтний эрч 10-15 градусаар эрс чангарах төлөвтэй байгаа талаар цаг уурын байгууллагаас мэдээллээ.
Улаанбаатарт: Шинийн 2-ны орой буюу хоёрдугаар сарын 19-20-нд шилжих шөнө цас орж явган шуургатай байна. Салхины хурд баруун өмнөөс хойш эргэж секундэд 13-15 метр хүрч ширүүсэх юм байна. Агаарын температур өмнөх өдрөөсөө 10-аад градусаар хүйтрэх юм байна.
Нийт нутгаар: Шинийн 3 буюу хоёрдугаар сарын 20-ны өдрөөс нутгийн баруун хагаст, 21-нд нутгийн зүүн хагаст цас орж, цасан болон шороон шуурга шуурч, салхи шуургатай, ихэнх нутгаар өмнөх өдрөөсөө агаарын температур 10-15 градусаар хүйтэрч хүйтний эрч чангарах юм байна.
Иймд нимгэн хувцастай хол замд явахгүй байх, бага насны хүүхдийг малд явуулахгүй байх, зам, даваа гүвээнд халтиргаа гулгаа үүсэж үзэгдэх орчин хязгаарлагдах болзошгүй байгааг анхаарууллаа.
Агаарын температур:
- Увс нуурын болон Дархадын хотгор, Завхан голын эх, Хүрэнбэлчир орчим, Идэр, Тэс, голын хөндийгөөр шөнөдөө -30...-35 градус, өдөртөө -18...-23 градус,
- Алтай, Хангай, Хөвсгөл, Хэнтийн уулархаг нутаг, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө -21...-26 градус, өдөртөө -8...-13 градус,
- Хангайн нурууны өвөр бэл, говийн бүс нутгийн өмнөд хэсэг, цас багатай энгэр газраар шөнөдөө -5...-10 градус хүйтэн, өдөртөө +6...+11 градус дулаан,
- говийн бүс нутгийн хойд хэсэг, Дорнод-Дарьгангын тал нутгаар шөнөдөө -10...-15 градус хүйтэн, өдөртөө 0...+5 градус дулаан,
- бусад нутгаар шөнөдөө -14...-19 градус, өдөртөө +1...-4 градус хүйтэн байна.
Хур тунадас:
- 19-нд Монгол-Алтай, Хөвсгөлийн уулархаг нутаг,
- 20-нд баруун болон төвийн аймгуудын ихэнх нутаг, говийн аймгуудын нутгийн хойд хэсгээр,
- 21-нд баруун аймгуудын нутгийн зүүн, төв, зүүн, говийн аймгуудын ихэнх нутгаар цас орж, цасан шуурга шуурна.
Салхи:
- 19-нд Алтайн уулархаг нутаг, Арц Богдын өвөр хоолойгоор,
- 20-нд ихэнх нутгаар,
- 21-нд төв, зүүн, говийн аймгуудын нутгаар секундэд 18-20 метр, зарим үед секундэд 24 метр хүрч ширүүсэж, шороон шуурга шуурна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
