Гэрлэх ёслолын ордон үүсгэн байгуулагдсаны тэгш ойг тэмдэглэхийг зөвшөөрөв
Нийслэлийн харьяа хоёр байгууллагын ойг энэ онд тэмдэглэхийг зөвшөөрч, НИТХ-аас тогтоолын төслийг өнөөдөр батлав.
Тодруулбал монгол түмний гал голомтоо бадраах хуримын ёслолын үйл ажиллагааг зохион байгуулж байгаа "Гэрлэх ёслолын ордон" ОНӨААТҮГ үүсгэн байгуулагдсаны 50 жилийн ойг энэ онд тэмдэглэн өнгөрүүлэхийг зөвшөөрөв. Ойг тэмдэглэхдээ төрийн хэмнэлтийн хуулийн дагуу зохион байгуулахыг тус газрын дарга Ү.Оюунзулд даалгалаа.
“Гэрлэх ёслолын ордон”-г 1975 онд ЗХУ-аас БНМАУ-д хүлээлгэн өгч, 1976 онд “Гэрлэх ёслолын ордон”-г аж ахуй, зохион байгуулалтын хувьд Улаанбаатар хотын АДХ-ын гүйцэтгэх захиргаанд харьяалуулжээ. Одоо тус ордон нь 37 ажилтан, албан хаагчтай байна.
Түүнчлэн эх барих, нярай, эмэгтэйчүүдийн тусламж үйлчилгээг үзүүлж буй нийслэлийн Амгалан амаржих газар буюу хуучнаар гуравдугаар төрөх эмнэлгийн 60 жилийн ойг төрийн хэмнэлтийн хуулийн дагуу тэмдэглэн өнгөрүүлэх тогтоолыг баталлаа. Амгалан амаржих газрын даргын албан үүргийг Г.Мөнхзул түр орлон гүйцэтгэж байгаа бөгөөд эмч, сувилагч, эх баригч гээд нийт 289 ажилтантай байна. Тус амаржих газар 1966 онд байгуулагджээ.
Хуримын ордон болон Амгалан амаржих газрын тэгш ойг тэмдэглэн өнгөрүүлэх санхүүжилтийг төрийн мөнгөнөөс гаргах боломжгүйг НИТХ-ын дарга хэлэв.
Нийслэлийн энэ оны төсвөөс Гэрлэх ёслолын ордны дээвэр болон танхимыг 2027 он хүртэл шинэчлэхэд нийт 4.5 тэрбумыг зарцуулахаар баталжээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
