Боловсролын салбарт хамтран ажиллах тухай Монгол, Чех хоёр улсын Засгийн газрын хэлэлцээрийн хүрээнд Бүгд Найрамдах Чех Улсын их, дээд сургуульд  2-10 сарын богино хугацааны туршлага судлах сургалтын 2026 оны тэтгэлэгт хөтөлбөрийн бүртгэл үргэлжилж байна.

Бүртгэл энэ сарын 15-ныг хүртэл явагдаж байгаа тул тавигдах шаардлагыг хангаж буй иргэд материалаа цахимаар илгээнэ үү.

Нэг. Тавигдах шаардлага 

• Бакалавр: Монгол Улсын магадлан итгэмжлэгдсэн их, дээд сургуулийн 1, 2 дугаар ангид 3.0 ба түүнээс дээш голч дүнтэй суралцаж байгаа иргэн.
• Магистрант: Бакалаврын зэрэгтэй, 3.0 ба түүнээс дээш голч дүнтэй, 2-оос доошгүй жил ажилласан туршлагатай, суралцаж байгаа.
• Докторант: Магистрын зэрэгтэй, 3.0 ба түүнээс дээш голч дүнтэй, 2-оос доошгүй жил ажилласан туршлагатай, суралцаж байгаа.

Хоёр. Тэтгэлэгт багтах зүйлс

• Сургалтын төлбөр
• Амьжиргааны зардал
• Тэтгэлэгт дараах зүйлс багтахгүй болохыг анхаарна уу. Үүнд:
• Олон улсын тээврийн зардал
• Виз олголттой холбоотой зардал
• Даатгал

Гурав. Бүртгэл

https://scholarship.esis.edu.mn/  холбоосоор хандан, хэрэглэгчийн эрх үүсгэн нэвтэрч, илгээх гарын авлагатай танилцан, цахим өргөдлийг бөглөж илгээнэ. Өргөдөлд дурдсан дараах баримт бичиг тус бүрийг англи хэлээр орчуулсан хувийн хамт PDF /1 файлын хэмжээ 5MB-аас ихгүй байх/ хэлбэрээр “баримт бичиг” хэсэгт хавсаргана.

Дөрөв. Цахим бүртгэлийн системд байршуулах баримт бичиг

Бакалавр, магистрын хөтөлбөрт бүртгүүлэх иргэд:

• Тодорхойлох захидал (2 багшийн);
• Бакалаврын зэрэгт суралцах оюутан бүрэн дунд болон түүнээс дээш боловсролын гэрчилгээ, дүнгийн жагсаалтын хамт;
• Монгол Улсын магадлан итгэмжлэгдсэн их, дээд сургуулийн суралцагч байх тохиолдолд нэмэлтээр дүнгийн хуулбар;
• Суралцах төлөвлөгөө /англи хэлээр 200-аас доошгүй үгтэй байх, монгол орчуулгыг хавсаргах/;
• Гадаад пасспорт;
• Англи хэлний B2 түвшний мэдлэгтэй болохыг батлах нотолгоо;
• Цагдаагийн бичиг (E-Mongolia системээс татаж авах боломжтой);
• Чех Улсын дээд боловсролын байгууллагын хүлээн авах/тэнцсэн тухай албан бичиг - хүлээн зөвшөөрөгдсөн гэсэн урилга (Acceptance letter).

Докторын хөтөлбөрт бүртгүүлэх иргэд:

• Тодорхойлох захидал (Багш-1, ажлын газар-1);
• Дээд боловсролын зэргийн дипломууд, тэдгээрийн дүнгийн жагсаалтын нотариатаар баталгаажуулсан хуулбар;
• Англи хэлний B2 түвшний мэдлэгтэй болохыг батлах нотолгоо;
• Суралцах төлөвлөгөө /англи хэлээр 500-аас цөөнгүй үгтэй байх, монгол орчуулгыг хавсаргах/;
• Эрдэм шинжилгээний бүтээлийн жагсаалт (Докторын сургалтад өргөдөл гаргах иргэд зайлшгүй хавсаргах, магистрын сургалтад өргөдөл гаргах иргэд хавсаргах шаардлагагүй ч хавсаргавал давуу талтай);
• Гадаад пасспорт;
• Цагдаагийн тодорхойлолт (Е-Mongolia системээс татаж авах боломжтой);
• Чех Улсын дээд боловсролын байгууллагын элсэлтийн урилга, багшийн урилга зэрэг тухайн элсэн орох сургуулиас олгогдох элсэлтийн материал (Acceptance letter).

Бүртгэл дуусах цаг дөхөх тусам системийн ачаалал ихэсдэг тул эрт бүртгүүлэхийг зөвлөж байна. Бүртгэлийн системтэй холбоотой мэдээллийг 7577-2727 дугаарт 09:00-12:00 цагийн хооронд, бүртгэлийн талаарх лавлагаа, мэдээллийг 51-262916 дугаарт холбогдож авна уу.

БНЧУ-ын Дээд боловсролын байгууллагуудын талаарх мэдээллийг www.studyin.cz, сургалтын хөтөлбөрийн талаарх дэлгэрэнгүй мэдээллийг https://regvssp.msmt.cz/registrvssp/csplist.aspx  сайтаас авах боломжтой.

Эх сурвалж: Боловсролын Яам