ЭСЯ: Вьетнам Улсад бүлэглэн хулгай хийсэн тохиолдолд 8 хүртэлх жилийн хорих ял оноодог

Э.Тэмүүлэн, iKon.mn
2026 оны 1 сарын 26
IKON.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Сүүлийн үед Вьетнам Улсад зорчих Монгол Улсын иргэдийн урсгал эрс нэмэгдэж байгаатай холбогдуулан визийн хугацаа хэтрүүлэх, гэмт хэрэгт холбогдох, анхаарал болгоомжгүйгээс шалтгаалан эрүүл мэндээрээ хохирох явдал цөөнгүй гарч байгаа юм. Тиймээс тус улсад суугаа Элчин Сайдын Яамнаас дараах анхааруулга, сэрэмжлүүлгийг хүргэж байна.

Олон нийтийн газар, жуулчдын төвлөрсөн бүсэд халаасны хулгай, дээрэм, залилангийн гэмт хэрэг цөөнгүй гарчээ. Иймд гар утас, түрийвч, үнэт эд зүйлсээ ил задгай авч явахгүй, аюулгүй байдлаа сайтар хангаж явахыг хүсье. Манай зарим иргэд хулгайн гэмт хэрэгт сэжиглэгдэн саатуулагдах явдал гарсаар байна. Вьетнам Улс нь хууль тогтоомж хатуу, ялангуяа бүлэглэн хулгай хийх тохиолдолд 8 хүртэлх жилийн хорих ялаар шийтгэдэг, чанга хатуу хууль тогтоомжтой болохыг мэдэгдэж байна.
  • Танихгүй хүний санал болгосон унаа, үйлчилгээ, бараа бүтээгдэхүүнээс татгалзаж, албан ёсны үйлчилгээг ашиглана уу.
  • Вьетнам Улсын хууль тогтоомжийг чанд мөрдөх нь зайлшгүй бөгөөд мансууруулах бодис, сэтгэцэд нөлөөт эм, хууль бус бараа бүтээгдэхүүн тээвэрлэх, хадгалах, хэрэглэх нь онцгой хүнд ял шийтгэлтэй болохыг анхаарна уу.
  • Бусдын эд хөрөнгийг гэмтээх, зодоон маргаанд оролцох, олон нийтийн дэг журам зөрчих нь эрүүгийн болон захиргааны хариуцлага хүлээлгэх үндэслэл болдог.
  • Албан ёсны зөвшөөрөлгүйгээр ажил эрхлэх, визийн хугацаа хэтрүүлэх нь торгууль ногдуулах, албадан гаргах арга хэмжээ авхуулах эрсдэлтэй.

Иргэд Та бүхэн өөрийн болон бусдын аюулгүй байдлыг хангаж, Вьетнам Улсын хууль тогтоомжийг чанд сахин, хариуцлагатай, соёлтой зорчихыг уриалж байна.

Монгол Улсаас Бүгд Найрамдах Социалист Вьетнам Улсад суугаа Элчин сайдын яам