"Heyball" бильярдын Дэлхийн цомд Монголын эрэгтэй баг түрүүллээ
Австралийн Логан хотод энэ сарын 16-наас 19-нийг дуустал үргэлжилсэн "Heyball" бильярдын Дэлхийн Цомын тэмцээнд Монголын эрэгтэй баг түрүүллээ.
Энэ тэмцээнд манай эрэгтэй баг хэсгийн шатанд Нидерланд, Марокког дараалан буулган авснаар хасагдах шатанд шалгарсан.
Ингээд эхний даваанд Польшийг 2:2-оор тэнцээд нэмэлт тоглолтоор хожсон юм.
Улмаар Марокког 3:0, хагас шигшээд Сингапурыг 3:1-ээр илүүрхсэн.
Шигшээд манай залуус Өмнөд Солонгосын багийг 2:2-оор тэнцсэн ч нэмэлт тоглолтоор ялагч боллоо.
Сингапур эрчүүд хүрэл медаль зүүсэн юм.
Харин эмэгтэй тамирчид хэсгийн шатанд Филиппинтэй оноо хуваасан ч Египет, Нидерландыг буулгаж авснаар хэсгээ тэргүүлсэн.
Хасагдах шатанд Шинэ Зеландтай 2:2-оор тэнцээд шийдвэрлэх оноогоор хожсон боловч шөвгийн наймд Филиппин Улсын тамирчдыг барсангүй.
Эмэгтэйчүүдийн ангилалд БНХАУ-ын баг алт, Бельги хүүхнүүд мөнгө, филиппинчүүд хүрэл медаль хүртлээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
