1965 оноос хойш дундаж наслалт нь хамгийн их өссөн улс орнууд

1965 онд дэлхийн хүн амын дундаж наслалт ердөө 54 жил байсан бол 2025 оны байдлаар энэ үзүүлэлт даруй 20 жилээр нэмэгджээ. Сүүлийн жаран жилийн хугацаанд бараг бүх улс оронд ахиц гарсан ч цөөн хэдэн улс дундаж наслалтаа 30 гаруй жилээр уртасгаж чаджээ. Эдгээр өндөр өсөлт гаргаж чадсан улсуудтай харьцуулбал АНУ-ын дундаж наслалт сүүлийн жаран жилийн хугацаанд ердөө 9 орчим жилээр л нэмэгдсэн байна.

Энэхүү график нь Our World in Data болон НҮБ-ын тоо баримтад үндэслэн 1965 оноос хойш дундаж наслалтаа хамгийн ихээр нэмэгдүүлж чадсан орнуудыг жагсаан харуулав.

 

Дундаж наслалт хаана хамгийн ихээр өсөв?

Энд дурдагдаж буй "Дундаж наслалт" гэх үзүүлэлт нь тухайн жилийн нас баралтын түвшнийг тогтмол гэж үзвэл шинээр мэндэлсэн хүүхэд дунджаар хэд наслах боломжтойг илэрхийлдэг.

• Мальдив: Дэлхийд тэргүүлж байгаа бөгөөд 1965 оноос хойш дундаж наслалт нь 41 жилээр нэмэгдэж, 2025 онд 82 насанд хүрэв.
• Азийн орнууд: Мальдивын адилаар Азийн хэд хэдэн орны наслалт мэдэгдэхүйц уртасжээ. Тухайлбал, Афганистанд 1965 онд дундаж наслалт 35 байсан бол одоо 67 болж өссөн байна.
• Энэтхэг: Эдийн засгийн тэлэлт болон эрүүл мэндийн салбарын дэвшлийн үр дүнд дундаж наслалт нь 27 жилээр нэмэгджээ.
• Африкийн орнууд: Тус тивээс Алжир улс хамгийн өндөр өсөлтийг үзүүлсэн байна. 1965 онд 43 байсан дундаж наслалт 2025 онд 77 болж өссөн нь Африктаа хамгийн өндөр үзүүлэлтүүдийн нэг юм. Нийтдээ Африкийн есөн улс дундаж наслалтаа багадаа 27 жилээр уртасгаж чаджээ.
• Хятад: Эдийн засгийн огцом шилжилтийн үед дундаж наслалтаа 26 жилээр нэмэгдүүлж, топ орнуудын эгнээнд багтсан байна. Энэ нь тус улсад дундаж наслалт жил бүр дунджаар 22 долоо хоногоор нэмэгдэж байсан гэсэн үг юм.

Монгол Улсын тухайд

Сонирхуулахад, манай улсын дундаж наслалт 1965 онд 48.7 жил байсан бол 2025 оны байдлаар 71-72 жилд хүрээд байна. Энэ нь 60 жилийн дотор 23 орчим жилээр нэмэгдсэн үзүүлэлт юм.

График #1. Монгол улсын дундаж наслалт 1950-2023 он

Эх сурвалж: visualcapitalist.com