Олон улсын эрүүл мэндийн чанар, өвчтөн аюулгүй байдлын хамгийн нэр хүндтэй шалгуурын нэг болох Joint Commission International JCI-ийн магадлан итгэмжлэлийг “Интермед” эмнэлэг дөрөв дэх удаагаа амжилттай баталгаажуулснаа өнөөдөр мэдэгдлээ.

Энэхүү итгэмжлэл нь эмнэлгийн өдөр тутмын үйл ажиллагаанд өвчтөний аюулгүй байдлыг нэгдүгээрт тавьж, олон улсын стандартыг тасралтгүй хэрэгжүүлэн, сайжруулалт хийж буй эсэхийг 3 жил тутам шалган баталгаажуулж, хагас жил тутам хянадаг шалгуур юм.

JCI гэж юу вэ?

• Joint Commission International (JCI) нь эмнэлэг, эрүүл мэндийн байгууллагын тусламж үйлчилгээ, өвчтөний аюулгүй байдлын түвшинг газар дээр нь очиж үнэлдэг олон улсын байгууллага юм. Стандарт шалгуурыг хангасан байгууллагад Gold Seal of Approval® буюу алтан тамгыг олгодог.
• Итгэмжлэх үйл явц нь бичиг баримт шалгахаас гадна JCI-ийн мэргэшсэн шинжээч нарын баг 4 өдрийн турш эмнэлгийн өдөр тутмын үйл ажиллагаа, барилга байгууламж зэргийг өндөр нарийвчлалтай шалгах процесс юм. “Интермед” эмнэлгийн хувьд энэ удаагийн үнэлгээ нь 10 сарын 27-30-ны хооронд үргэлжилж, шинжээчийн баг “трейсер аргачлал”-ыг ашиглан бодит үйлчлүүлэгчийн замналыг эхнээс нь дуустал дагаж, тусламж үйлчилгээг ямар журмаар, ямар аюулгүй байдлын хамгаалалттай дамждагийг шалгалаа.
• Энэ жилийн үнэлгээний онцлог нь 2025 оны 1-р сарын 1-нээс мөрдөгдөж эхэлсэн “Эмнэлгийн стандартын 8-р хэвлэл” (Hospital Standards, 8th Edition) байсан бөгөөд энэхүү шинэ стандарт нь өмнөх стандартаас илүү өндөр шаардлагаар өвчтөний аюулгүй байдлын хэмжүүр, халдвар хяналт, өндөр эрсдэлт эмийн менежмент, мэс заслын аюулгүй ажиллагааны үе шат, байгууллагын дотоод чанарын удирдлагын үр дүнг илүү тодорхой үзүүлэлтээр хэмждэг болсон.
• JCI-ийн стандарт нь өнөөдөр дэлхийн 70 гаруй улс дахь, 1,000 гаруй эмнэлэг, эрүүл мэндийн байгууллагад ашиглагдаж байна. Энэ нь Интермед эмнэлгийн үйлчилгээ зөвхөн дотооддоо биш, олон улсын жишиг шалгууртай харьцуулахад ямар түвшинд байгааг баталгаажуулдаг юм.

JCI нь хэрэглэгчдэд ямар ач холбогдолтой вэ?

1. Аюулгүй орчин

Эмнэлэг бол өндөр эрсдэлт орчин. Иймд халдвар хамгааллыг чанд сахиж, нарийн урсгалаар эмчилгээ үйлчилгээг хамгаалагдсан орчинд үзүүлдэг байх нь чухал.

2. Олон улсын жишиг үйлчилгээ

JCI-ийн шалгуур нь дэлхийн 70+ оронд ашиглагдаж байгаа тул Интермед эмнэлэгт авсан тусламж, үйлчилгээний түвшинг өөр улс орнуудын нэр хүндтэй эмнэлгүүдийн түвшинтэй шууд харьцуулж болдог.

Энэ нь Монголдоо эмчилгээ үйлчилгээ авах нь олон улсын стандарттай ижил алхам, ижил хяналтаар баталгаажсан гэсэн үг.

3. Чанарын тасралтгүй хяналт

“Интермед” эмнэлэг JCI-ийн магадлалыг дөрөв дэх удаагаа итгэмжлэгдсэн нь өвчтөн аюулгүй байдлыг нэн тэргүүнд тавьж, олон улсын түвшний үйлчилгээг эх орондоо тасралтгүй хүргэхээ дахин баталж байна. Цаашид чанар, аюулгүй байдлын үзүүлэлтүүдээ тогтмол сайжруулж, судалгаа-нотолгоонд суурилсан шинэчлэлээ улам эрчимжүүлэх болно.