Мексикийн Ерөнхийлөгч хөлбөмбөгийн ДАШТ-ий нээлтийн тасалбараа энгийн иргэнд бэлэглэнэ
Мексик улсын ерөнхийлөгч Клаудиа Шэйнбаум хөлбөмбөгийн Дэлхийн Аварга Шалгаруулах Тэмцээн (ДАШТ)-ий нээлтийн тоглолтын тасалбараа энгийн иргэнд бэлэглэнэ гэж мэдэгджээ.
Тэрбээр өнгөрсөн Даваа гарагт хийсэн хэвлэлийн бага хурлын үеэр "Би өөрийнхөө тасалбарыг хөлбөмбөгт үнэхээр хайртай ч үзэх боломжгүй энгийн иргэнд бэлэглэхээр шийдлээ" гэв. Ингэхдээ тэр залуу эмэгтэйд эсвэл насанд хүрээгүй охинд ийм бэлэг өгөхөөр болсноо онцолжээ.
Олон улсын хөлбөмбөгийн холбоо (FIFA)-ны тэргүүн Жианни Инфантино өнгөрсөн наймдугаар сард Мексикт зочлох үеэр тус улсын төрийн тэргүүнд тусгай тасалбар бэлэглэсэн юм.
00001 дугаартай уг тасалбар нь ирэх оны зургаадугаар сарын 11-нд нээлтээ хийх Мексик, АНУ, Канад гурван улсын хамтран зохион байгуулж буй хөлбөмбөгийн тоглолтынх аж.
2026 оны зургаадугаар сарын 11-нээс долдугаар сарын 19-нийг дуустал үргэлжлэх хөлбөмбөгийн ДАШТ-ий нээлтийн тоглолт "Ацтек" цэнгэлдэхэд болно. Мексик улс 1970, 1986 оны ДАШТ-ийг зохион байгуулсан туршлагатай бөгөөд нээлтийн тоглолтыг гурав дахиа зохион байгуулж буй анхны улс болох юм.
Эх сурвалж: Reuters
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
