Энэ сарын 14-нд нутгийн баруун хагаст, 15-нд нутгийн зүүн хагаст цасан шуурга шуурч, ихэнх нутгаар хүйтний эрч чангарна

Гэрэл зургийг MPA агентлагийн онцгой зөвшөөрөлтэйгөөр ашиглав

Энэ сарын 14-нд нутгийн баруун хагаст, 15-нд нутгийн зүүн хагаст цас орж, цасан шуурга шуурч, ихэнх нутгаар хүйтний эрч чангарахыг цаг уурын байгууллагаас мэдээллээ. 

2025 оны 11 дүгээр сарын 10-20-ныг хүртэлх ирэх 10 хоногийн цаг агаарын урьдчилсан төлөв:   

Хур тунадас:

• 11-нд баруун болон төвийн аймгуудын нутгийн зарим газраар,
• 12-нд Хэнтийн уулархаг нутгаар,
• 13-нд баруун аймгуудын нутгийн баруун хэсгээр,
• 14-нд баруун болон төвийн аймгуудын ихэнх нутгаар,
• 15-нд төвийн аймгуудын нутгийн зүүн, говийн аймгуудын нутгийн хойд хэсгээр, зүүн аймгуудын ихэнх нутаг,
• 16-нд Халх голын сав газраар цас орж, цасан шуурга шуурна.

Салхи:

• Ихэнх нутгаар секундэд 5-10 метр,
• 13-нд Алтайн салбар уулсаар,
• 14-нд ихэнх нутгаар,
• 15-нд нутгийн зүүн хагаст,
• 16-нд говь, тал, хээрийн нутгаар секундэд 15-17 метр хүрч ширүүснэ. 

Агаарын температур:

• Хугацааны эхэн болон сүүлээр хүйтний эрч сулавтар байх боловч
• 14-нд баруун болон төвийн аймгуудын нутгаар,
• 15, 16-нд ихэнх нутгаар хүйтний эрч чангарч Хангай, Хөвсгөлийн уулархаг нутаг, Хүрэнбэлчир, Идэр, Тэс голын хөндийнгөөр шөнөдөө -26...-31 градус, өдөртөө -14...-19 градус,
• Алтай, Хэнтийн уулархаг нутаг, Туул, Тэрэлж голын хөндийгөөр шөнөдөө -20...-25 градус, өдөртөө -10...-15 градус,
• говийн бүс нутгийн өмнөд хэсгээр шөнөдөө -8...-13 градус, өдөртөө -3...-8 градус,
• бусад нутгаар шөнөдөө -14...-19 градус, өдөртөө -7...-12 градус хүйтэн байна.

Улаанбаатарт энэ сарын 11-12-нд шилжих шөнө ялимгүй цас орно 

Хур тунадас: 11-12-нд шилжих шөнө ялимгүй цас, 14-15-нд цас орж, цасан шуурга шуурна.   

Салхи: Ихэнх хугацаанд секундэд 5-10 метр. 14-15-нд баруун өмнөөс хойш эргэж секундэд 15-17 метр хүрч ширүүснэ.

Агаарын температур: Хугацааны эхэн болон сүүлчээр хүйтний эрч суларч шөнөдөө Яармаг-Сонгины орчмоор -12...-17 градус, бусад хэсгээр -7...-12 градус, өдөртөө -1...-6 градус хүйтэн байна.

14-16-нд хүйтний эрч чангарч шөнөдөө Яармаг-Сонгины орчмоор -20..-25 градус, бусад хэсгээр -15...-20 градус, өдөртөө -8...-13 градус хүйтэн байна.