О.Эрдэнэболор: Салхинцэцэг өвчний үед өдөр бүр усанд оруулахгүй бол идээт үрэвсэл болж хүндрэх эрсдэлтэй

Гэрэл зургийг MPA агентлагийн онцгой зөвшөөрөлтэйгөөр ашиглав

Цэврүүт тууралтат хам шинж буюу энтеровирус, гар, хөл, амны өвчин, салхинцэцэг сүүлийн үед ихээхэн тохиолдож байгааг Халдварт Өвчин Судлалын Үндэсний Төв(ХӨСҮТ)-өөс мэдээлэв.

Ялангуяа салхинцэцгийн өвчлөл зонхилон гарч байгаа тул зөвлөгөө мэдээллийг хүргэж байна.

Салхинцэцэг нь агаар дуслын дамждаг, намар болон өвлийн улиралд гардаг цочмог халдварт өвчин.

Илрэх шинж тэмдгүүд нь

• халуурах
• биеэр гүвдрүүт тууралт гарах
• загатнах зэрэг юм.

Салхинцэцэг болон энтеровирусийн халдварын үед илрэх шинжүүд төстэй учраас мэргэжлийн эмчид үзүүлж байж тодорхойлох боломжтой аж.

ХӨСҮТ-ийн Элэгний клиникийн эмч О.Эрдэнэболор "Салхинцэцэг өвчний нууц хугацааг 14-20 хоног гэж үздэг. Эхний тууралт гарснаас хойш 10 хоногийн хугацаанд халдварлалт өндөр.

Мэргэжлийн эмчид үзүүлж эмчилгээгээ бичүүлж аваад гэртээ эмчлэх бол 

1. Өдөр бүр усанд оруулна. Ингэснээр хоёрдогч халдвар авахаас сэргийлнэ. Цэврүү нь халдвартай, их загатнадаг учраас маажсан шарх руу халдвар орох эрсдэлтэй. Улмаар арьсны идээт үрэвслээр хүндрэх магадлалтай тул өдөр бүр халуураагүй үед нь усанд оруулах шаардлагатай.
2. Амин дэмээр баялаг халуун хоол ойр ойр өгөх.
3. Шингэн юм сайн уулгах хэрэгтэй. 

Салхинцэцгээр өвдсөн хүүхдийг агаарт гаргаж болохгүй гэх өрөөсгөл ойлголт иргэдийн дунд бий. Гадаа гарч салхи авахад хүндрэх эрсдэл бага. Аль болох хөнгөн хувцаслаж, өдөр бүр усанд оруулбал тууралт хурдан эдгэрнэ" гэлээ.

Мөн энэ өвчний үед халуун ногоотой хоол, хийжүүлсэн ундааг хориглодог байна.