Шинэ тоглогч controlez-ийн сайн буудалт "The MongolZ" багийн эхний хожлыг авч ирлээ

Цахим спортын "Counter Strike 2" тоглоомын нэгдүгээр зэрэглэлийн "Intel Extreme Masters Chengdu 2025" тэмцээн Хятад улсын Чэнду хотноо өнөөдөр эхэлж байна.

"The MongolZ" баг А хэсгийн эхний учраандаа Норвегийн "HEROIC"-ийн эсрэг "Во3" (гурван "map"-аар ялагчийг тодруулах) журмаар тоглож, 2:1 онооны харьцаатай ялалт байгууллаа. Ийнхүү манай улсын баг хэсгээсээ хасагдах шатанд шалгарахын төлөө Украины "Natus Vincere" болон Данийн "Astralis" багийн аль хожсонтой нь маргааш 17:30 цагт тоглохоор болж байна.

Тэд өнөөдрийн тоглолтод эсрэг багийн сонгосон "Overpass map" дээр хамгаалах талаас дөрвөн үеийн дутуу байраа сольсон бөгөөд довтлох талаас зургаан үе авсан хэдий ч 10:13 тооны харьцаатай хожигдсон. Энэ "map" дээр манай багийн шинэ тоглогч controlez буюу Б.Өнөдэлгэр 19 kill хийснээр 910-ын хамт багаа тэргүүлэв.

Үргэлжлүүлэн өөрсдийн сонгосон "Inferno map" дээр довтлох талаасаа хоёр үеийн давуутай байраа сольж, эсрэг багийн тактикийг амжилттай хамгаалснаар 13:6 тооны харьцаатай хожил байгуулав. Энэ "map" дээр controlez 22 kill хийж, хоёр багийн 10 тоглогчийг тэргүүлсэн юм.

Ийнхүү тоглолт сүүлийн "Ancient map" дээр шийдвэрлэгдэхээр болж, "The MongolZ" баг 13:5 тооны харьцаатай хожил байгуулж байна.