Дуучин Ж.Мишээл "Silk Way Star" шоуны дөрөвдүгээр бүлэгт түрүүлэв

Э.Тэмүүлэн, iKon.mn

2025 оны 10 сарын 13

IKON.MN

Казахстаны "Jibek Joly" телевизийн "Silk Way Star" төсөлд 12 орны авьяаслаг уран бүтээлчид оролцож буй. Евразийн бүс нутагт хамаарах тус 12 орны уран бүтээлчдийн тоонд Монголын дуучин Ж.Мишээл багтсан юм.

Тодруулбал энэ бүс нутгаас дэлхийн од авьяастан төрүүлэх үндсэн зорилготой тус төсөлд Азербайжан, Армени, Гүрж, Казахстан, Киргиз, БНХАУ, Малайз, Монгол, Тажикистан, Туркменистан, Узбекистан, БНСУ-ын уран бүтээлчид оролцож байна.

Өнгөрсөн есдүгээр сарын 20-ноос олон нийтийн хүртээл болж эхэлсэн тус нэвтрүүлэг долоо хоног бүрийн Бямба гарагт шинэ нэвтрүүлгээ цацаж буй. Нийт 10 долоо хоногийн турш цацагдах тус нэвтрүүлэгт нийлбэр дүнгээр оролцогчдод оноо өгч буй юм.

Дуучин Ж.Мишээлийн хувьд эхний ангид "Бундан улаан" дуугаар оролцож, шүүгчдээс 104 оноо авснаар дөрөвдүгээр байранд жагсах болсон билээ.

Улмаар хоёрдугаар ангид алдарт дуучин Бруно Марсын "Uptown Funk" дууг дуулаад 118 оноогоор гуравдугаар байранд жагссан юм.

Харин гуравдугаар ангид уран бүтээлчид Казахстан дуугаар өрсөлдсөн. Ж.Мишээл залуу дуучин Ayau-гийн 2023 онд гаргасан бүтээл болох sybyrlaiyn дууг олонд хүргэсэн юм. Ингээд БНХАУ-ын дуучин Жан Хе Шуаны хамт 108 оноогоор хоёрдугаар байр эзэлжээ.

Харин өнгөрсөн долоо хоногийн Бямба гарагт гарсан дөрөвдүгээр нэвтрүүлгээр уран бүтээлчид сонгосон дуугаа тухайн орны хэлээр дуулсан юм. Ж.Мишээлийн хувьд "Wu Niang" хэмээх хятад дуу сонгож дуулжээ. Ингэснээр Малайзын дуучны хамтаар 120 оноо авснаар дөрөвдүгээр ангид тэргүүлэв.

Ингээд дөрвөн нэвтрүүлгийн дараагаар нийлбэр дүнгээр Казахстаны дуучин Алем 470 оноогоор тэргүүлж буй бол Монголын дуучин Ж.Мишээл, Малайзын дуучин Язмин Азиз нар ижил 450 оноогоор нэхэж явна.

Сонирхуулахад тус нэвтрүүлгийн хамгийн сүүлийн дугаар арваннэгдүгээр сарын 22-нд цацагдах юм.

Анхааруулга

Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!