Г.Очирбат: Э.Батшугар гишүүн ээ, аавдаа зарим юмнаас хол бай гэж хэлээч
УИХ-ын чуулганы нэгдсэн хуралдаанаар 2026 оны төсвийг хэлэлцэж байна. Хэлэлцэж буй асуудалтай холбогдуулан УИХ-ын гишүүн Г.Очирбат дараах шүүмжлэлийг хэлэв.
Тэрбээр “Энэ төсөв ямар утгагүй. Төсвийн хүрээний мэдэгдэл дунд хугацааны төлөвлөгөөтэй уягдаагүй, жилийн төлөвлөгөөгөө үгүйсгэсэн төсөв байна.
Ерөнхий сайд өөрийнхөө төсвийн 1.5 тэрбумаар нэмж оруулж ирж. УИХ-ын дарга, Тамгын газрынх 3.1 тэрбумаар буурсан байгаа юм. Гэхдээ 2019 онтой харьцуулахад 5-6 дахин өссөн байгаа. Монгол Улсын Ерөнхийлөгчийн Тамгын газрын төсөв 2019 онд 4.6 тэрбум, 2020 онд 6.6 тэрбум төгрөг байсан бол энэ жил 33.6 тэрбум төгрөг болсон байна.
Иргэд төлсөн татварыг нь зөв зарцуулаасай гэж хүсэж байгаа. Гэтэл хэдэн дарга нь өөрсдийнхөө төсвийг хэмнэж чадахгүй байна.
ЗГХЭГ 14.4 тэрбум төгрөгөөр зардлаа нэмүүлж.
Эдийн засгийн хөгжлийн төвд 2025 онд 3 тэрбум төгрөг тавьж байсан бол 2026 онд 7.8 тэрбум төгрөг болгож оруулж ирсэн байна. Хархорин хотын захиргааны албанд 4 тэрбум төгрөг төсөвлөж байсан бол энэ жил 7 тэрбум, эрчим хүчний реформд 2.7 тэрбум төгрөг зориулж байсан бол энэ жил бараг хэвээр нь 2.6 тэрбумыг дахин төсөвлөсөн байна.
Мөн дээр нь шинээр Шинэ хоршоо хөгжлийн нэгжид 4.4 тэрбум тавьсан байна.
Энэ шударга ёс юм уу. Баахан нэгж, хороогоо болиулъя, иргэдийнхээ төлж байгаа татварыг хэмнэе гээд байсан хэр нь ийм байна.
Алдагдалгүй төсөв баталъя гэдэг ч ирэх оны төсөв 1.3 их наядын алдагдалтай байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
