Өнгөрсөн сард олон нийтийн газарт зүй бусаар биеэ авч явах зөрчил 12.6 хувиар өсөв

Гэрэл зургийг MPA агентлагийн онцгой зөвшөөрөлтэйгөөр ашиглав

Улсын хэмжээнд энэ оны наймдугаар сард нийт 258,138 зөрчил бүртгэгдсэн нь өмнөх долдугаар сартай харьцуулахад 3.2 хувиар өссөнийг Улсын Ерөнхий Прокурорын Газраас мэдээллээ. 

Бүртгэгдсэн нийт зөрчлийн

• 64.9 хувь нь нийслэлд,
• 35.1 хувь нь орон нутагт гарчээ. 

Үүнээс 98.7 хувийг цагдаагийн байгууллага, 1.3 хувийг гааль, татвар, Гадаадын иргэн, харьяатын газар, Онцгой байдлын газар зэрэг бусад эрх бүхий байгууллага шалган шийдвэрлэсэн байна. 

Наймдугаар сард зөрчил гаргасан 254,279 хүнд шийтгэл оногдуулсан нь өмнөх сараас 3.4 хувиар, 1,072 хуулийн этгээдэд шийтгэл оногдуулсан нь өмнөх сараас 10.7 хувиар тус тус өссөн байна.

Шийтгэл оногдуулсан иргэний 77.1 хувь нь эрэгтэй, 22.9 хувь нь эмэгтэй бөгөөд нийт зөрчил гаргасан иргэдийн 60.9 хувь нь 26-45 насныхан байна.

Нийт зөрчлийн шийтгэл оногдуулсан байдлыг авч үзвэл:

244,002 буюу 95.5 хувийг газар дээр нь хялбаршуулсан журмаар, 7,579 буюу 2.9 хувийг бүртгэлд авч хялбаршуулж, 709 буюу 0.2 хувьд нь зөрчлийн хэрэг бүртгэлтийн ажиллагаа явуулан эрх бүхий албан тушаалтан шийтгэл оногдуулсан бол 3,061 буюу 1.2 хувьд нь шүүхээс шийтгэл оногдуулж шийдвэрлэсэн.

Наймдугаар сард

• Олон нийтийн газарт зүй бусаар биеэ авч явах зөрчил 12.6 хувиар,
• Хүний биед халдах зөрчил 1.6 хувиар,
• Хүүхдийн эрхийг зөрчих зөрчил 2.8 хувиар,
• Замын хөдөлгөөний аюулгүй байдлын тухай хууль зөрчих зөрчил 2.3 хувиар,
• Гаалийн тухай хууль зөрчих зөрчил 7.2 хувиар,
• Нийгмийн даатгалын тухай хууль зөрчих зөрчил 49 хувиар,
• Татварын хууль зөрчих зөрчил 28.4 хувиар өссөн байна.

Харин танхайрах зөрчил 5.4 хувиар, хулгайлах зөрчил 25.9 хувиар тус тус буурчээ.