Боловсрол, шинжлэх ухааны сайдын 2024 оны А/59, А/101, мөн 2025 оны А/414 дүгээр тушаалын хэрэгжилтийг хангах хүрээнд төрийн өмчийн ерөнхий боловсролын сургуулийн VI-XII ангид цахим контент, дижитал сурах бичгийн систем нэвтрүүлж эхэлснийг Боловсролын Ерөнхий Газар(БЕГ)-аас мэдээллээ.

Энэхүү ажлын гүйцэтгэгчээр Унгар улсын “MOZAIK KIADO KFT” ХХК шалгарч, 2024 оны есдүгээр сард БЕГ-тай гэрээ байгуулан хамтран ажиллаж байгаа аж.

2024–2025 оны хичээлийн жилд хийгдсэн онцлох ажлууд:

• 22,680 багш, 377804 суралцагчийн medle.mn домайн өргөтгөлтэй хаягийн бүртгэл баталгаажиж, дижитал платформд нэвтрэх боломжтой болов.
• 711 3D үзүүлэн, 243 цахим хичээл, 111 видео хичээл монгол хэлээр орчуулагдан платформд байршуулагдсан бөгөөд орчуулах ажил үргэлжилсээр байна.
• Дунд, ахлах ангийн сурах бичгийг цахим хэлбэрт шилжүүлж нэмэлт агуулгаар баяжуулсан.
• Үндэсний 30 сургагч багш бэлтгэгдэж, аймаг, нийслэлийн хэмжээнд сургалт, түгээн дэлгэрүүлэх ажлыг зохион байгуулж байна.
• Одоогоор 10,000 гаруй багш платформтой танилцаж мэдээлэлтэй болов.

2025–2026 оны хичээлийн жилд хийх ажлын төлөвлөгөө:

• 8-10 дугаар сар: Үндэсний сургагч багш, боловсролын газрын мэргэжилтэн, сургалтын менежерүүдийг сургалтад хамруулж, багш, суралцагч, эцэг эх, асран хамгаалагчдад зориулсан цахим гарын авлагыг түгээнэ.
• 9-6 дугаар сар: 36,000 багш, 432,000 суралцагчийг бүрэн хамруулж, жишиг цахим хичээл боловсруулан хуваалцаж, улирал бүр цахим сорил, даалгавар зохион байгуулна.
• 9-6 дугаар сар: Мониторинг, зөвлөн туслах ажлыг тогтмол хэрэгжүүлж, сурагчдын ахиц дэвшлийг судлан тайлан нэгтгэнэ.

Системийн ач холбогдол:

• Багш: Хичээл заах бүх үе шатанд цахим орчныг үр дүнтэй ашиглах, суралцагчийн ахицыг бодит өгөгдлөөр үнэлэх боломжтой болно.
• Суралцагч: Хичээлээ илүү ойлгомжтой, сонирхолтойгоор үзэж, бие даан суралцах, өөрийн ахиц дэвшлийг тогтмол харах боломжтой.
• Цаасан сурах бичгийн хүртээмжийн асуудлыг шийдвэрлэж, баяжуулсан цахим сурах бичгээр мэдлэгээ гүнзгийрүүлэх шинэ боломж нээгдэнэ гэж БЕГ-аас мэдээллээ.

Mozaik цахим боловсрол ба сургалт: www.mozaweb.mn