"Долдугаар сарын 19-нөөс наймдугаар сарын 19-нд 8.4 сая тонн нүүрс экспортолсон нь өмнөх саруудын дунджаас 30% нэмэгдсэн дүн"
Засгийн газрын ээлжит хуралдаан өнөөдөр боллоо.
Хуралдаанаар
- “Экспортыг нэмэгдүүлэх талаар авах зарим арга хэмжээний тухай” Засгийн газрын тогтоолын төсөл
- “Засгийн газрын агентлагийн бүтэц, орон тооны талаар хэрэгжүүлэх зарим арга хэмжээний тухай” Засгийн газрын тогтоолын төсөл
- “Үл хөдлөх хөрөнгө шилжүүлэх тухай” Засгийн газрын тогтоолын төсөл
- Улсын Их Хурлын гишүүн О.Цогтгэрэлийн санаачлан боловсруулсан Нэмэгдсэн өртгийн албан татварын тухай хуульд нэмэлт, өөрчлөлт оруулах тухай хуулийн төсөлд Засгийн газраас өгөх санал, дүгнэлт
- Улсын Их Хурлын гишүүн О.Саранчулуун нарын санаачлан боловсруулсан Нийгмийн ажлын тухай анхдагч хуулийн төсөлд Засгийн газраас өгөх санал, дүгнэлтийн тухай
- “Хүнс, хөдөө аж ахуйн салбарын 2025-2026 оны өвөлжилт, хаваржилтын бэлтгэл хангах зарим арга хэмжээний тухай” Засгийн газрын тогтоолын төслийг хэлэлцлээ.
Мөн
- Монгол Улсын Ерөнхий сайд “Шивээ-Овоо” ХК-ийн уурхайн үйл ажиллагаатай танилцсан талаар
- Гэмт хэргээс урьдчилан сэргийлэх ажлыг зохицуулах зөвлөлөөс 2021-2025 онд гэр бүлийн хүчирхийллээс урьдчилан сэргийлэх чиглэлээр авч хэрэгжүүлсэн арга хэмжээний тайлангийн талаар
- 2025-2026 оны хичээлийн жилд ерөнхий боловсролын сургуулийн бага ангид заах гадаад хэлний боловсролын талаар
- Боловсролын цахим шилжилтийн талаар зэрэг асуудалтай танилцсан байна.
Тэргүүн шадар сайд Н.Учрал Засгийн газрын хуралдаанаас гарсан шийдвэрийг танилцуулахдаа "Долдугаар сарын 19-нөөс наймдугаар сарын 19-н буюу нэг сарын хугацаанд 8.4 сая тонн нүүрс экспортоллоо. Энэ нь өмнөх саруудын дунджаас 30 хувиар нэмэгдсэн үзүүлэлт юм. Энэ онд 80 сая тонн нүүрс, ирэх онд 85-90 сая тонн нүүрс экспортлохоор төсвийн хүрээний мэдэгдэлд тусгана.
Экспортыг нэмэгдүүлэхийн тулд хүнд суртал гаргадаг, бичиг баримт бүрдүүлдэг, цохуулдаг, тамга дардаг зэрэг процесс цаг хугацаа их шаарддаг, хувийн хэвшилд дарамт учруулдаг байсан. Гаалийн хилээр бараа бүтээгдэхүүн нэвтрүүлэхэд тавих хяналтын журам гэж байдаг. Журмыг өөрчлөх цахим систем бэлэн болсон. Ингэснээр Гаалийн Ерөнхий Газар(ГЕГ), Татварын Ерөнхий Газар(ҮТЕГ), Боомтын захиргаа, Хил Хамгаалах Ерөнхий Газар(ХХЕГ) хоорондоо мэдээлэл солилцох бололцоо бүрдсэн. Дээр дурдсан журмыг хэрхэн өөрчлөх талаар иргэд, аж ахуйн нэгжүүдээс санал авч, нээлттэй хэлэлцүүлэг хийж байгаа. Олон нийтээс 17,000 гаруй санал ирүүлсэн. Наймдугаар сарын 31-ний дотор уг журмыг батлахыг ГЕГ-ын даргад Засгийн газрын тогтоолоор үүрэг болгоод байгаа" гэв.
Мөн уул уурхайн бус бүтээгдэхүүний экспортыг дэмжихийн тулд нэгдсэн нэг худалдааны цонхтой болох ажлыг эхлүүлсэн байна.
шууд:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
