Повер банктай холбоотой галын ослуудын дараа Хятад улс аюулгүй байдлын шаардлагаа чангатгав

Повер банктай холбоотой хэд хэдэн гал түймрийн дараа Хятадын эрх баригчид лити-ион төрлийн батарей үйлдвэрлэгчдээс аюулгүй байдлын гэрчилгээг заавал авахыг шаардаж эхэлжээ.

Тухайлбал өнгөрсөн Баасан гарагаас эхлэн Хятадын зах зээлд ийм төрлийн бүтээгдэхүүн үйлдвэрлэх, борлуулах, түгээхдээ CCC (China Compulsory Certification) буюу 3C гэрчилгээг заавал авсан байх шинэ журмыг нэвтрүүлж байгаагаа тус улсын Зах Зээлийн Зохицуулалтын Төрийн Удирдлагын газар мэдээлсэн байна.

Энэхүү журам нь өмнө үйлдвэрлэгдсэн “CCC” гэрчилгээгүй бүтээгдэхүүнүүдийг шууд хориглоогүй ч нийтийн тээврийн хэрэгсэл, олон нийтийн газарт ашиглахыг хориглох эхлэл байж магадгүй юм.

Хятадын иргэний агаарын тээврийн захиргаа ийм хоригийг хэдийнээ нэвтрүүлээд байгаа.

Хятад улс “CCC” гэрчилгээг олгодог болоод удаж байгаа ч өнөөдрийг хүртэл заавал авахыг үйлдвэрлэгчдээс шаарддаггүй байсан юм.

Шэнжэн хотод үйл ажиллагаа явуулдаг повер банкны томоохон үйлдвэрлэгч Romoss Technology компанийн бүтээгдэхүүнтэй холбоотой галын осол хэд хэдэн удаа гарсны дараа тус компани өнгөрсөн сард үйлдвэрлэлээ зогсоож байв.

Тухайлбал Бээжингийн нэг их сургуулийн дотуур байранд, Хонконг чиглэлийн нисэх онгоцонд тус компанийн бүтээгдэхүүнтэй холбоотой гал гарч байжээ.

Эх сурвалж: South China Morning Post