АНУ-ын ногдуулсан 15 хувийн татварын хариуд Өмнөд Солонгос $350 тэрбумын хөрөнгө оруулахаар тохиролцжээ

Ерөнхийлөгч Трампын өгсөн яриа хэлэлцээний хугацаа дуусахаас хоёрхон өдрийн өмнө АНУ, Өмнөд Солонгосын талууд хоорондын худалдааны нөхцөлөө шинэчлэх тохиролцоонд хүрчээ.

Тухайлбал АНУ-ын засаг захиргаа Өмнөд Солонгосын бараа бүтээгдэхүүнд ногдуулахаар төлөвлөсөн 25 хувийн импортын татвараа 15 хувь болгон бууруулахаар болсон бол Өмнөд Солонгос хариуд нь АНУ-д $350 тэрбумын хөрөнгө оруулах амлалт авсан байна.

Ийнхүү Өмнөд Солонгос улс бараа бүтээгдэхүүнээ АНУ-ын зах зээлд экспортлоход Япон, Европын орнуудын нэгэн адил 15 хувийн татвартай болж байгаа юм.

Гэрээгээр Өмнөд Солонгосын автомашинууд АНУ-д 15 хувийн импортын татвартай нийлүүлэгдэхээр болжээ. Хариуд нь тус улс АНУ-аас $100 тэрбумын дүнтэй шингэрүүлсэн хий зэрэг бусад эрчим хүчний бүтээгдэхүүн авахаар болсон байна.

Лхагва гарагт АНУ-ын ерөнхийлөгч Дональд Трамп, Өмнөд Солонгосын засгийн газрын төлөөлөгч нар Цагаан ордонд уулзах үеэр уг гэрээг баталжээ.

Трамп сошиал хуудсандаа “АНУ-ын засаг захиргаа БНСУ-тай Бүрэн Худалдааны гэрээ байгуулахаар тохиролцсоныг дуулгахад таатай байна. Энэ гэрээгээр Өмнөд Солонгосын тал миний сонгосон АНУ-ын эзэмшилтэй салбаруудад $350 тэрбумын хөрөнгө оруулах юм” гэж бичсэн байна.

Өмнө нь Япон улс $550 тэрбум, Европын Холбоо $600 тэрбумын хөрөнгө оруулалтын амлалтаар АНУ-тай худалдааны гэрээгээ шинэчлэн байгуулсан юм.

Трамп бас ойрын хоёр долоо хоногийн дотор Цагаан ордонд Өмнөд Солонгосын ерөнхийлөгч И Жэ Мюнтэй уулзахаар болсныг мэдээлжээ.

Трампын мэдэгдлийн дараа ерөнхийлөгч И Жэ Мюн мөн худалдааны гэрээ байгуулахаар болсныг зарласан байна.

Өмнөд Солонгосын $350 тэрбумын хөрөнгө оруулалтын $150 тэрбум нь АНУ-ын хөлөг онгоц үйлдвэрлэлийн салбарт зориулагдахыг тэр мэдээлжээ.

Сөүлийн эрх баригчид Америкийн хөлөг онгоц үйлдвэрлэлийн салбарыг дахин хүчирхэгжүүлэхэд туслах “MAGSA” (Make American Shipbuilding Great Again) гэх санаачилга дэвшүүлээд байсан юм.

Үлдсэн $200 тэрбум нь хагас дамжуулагч, батарей, био технологи, эрчим хүч зэрэг бусад стратегийн салбаруудад зориулагдахаар болжээ.

Гэхдээ хоёр улс АНУ-ын өмнө нь ногдуулсан хөнгөн цагаан, гангийн импортын 50 хувийн татварыг хэвээр үлдээхээр тохиролцсон байна.

Трампын засаг захиргаа металлын татвараа Япон, Европын Холбоотой байгуулсан гэрээндээ бас бууруулаагүй юм.

Эх сурвалж: Yonhap News