ЭСЯ: Номхон далайн эрэг орчмын нам дор газар амьдардаг болон аялж буй иргэд цүнамигийн аюулаас сэрэмжилнэ үү

Г.Мөрөн, iKon.mn

2025 оны 7 сарын 30

iKon.MN

Өнөөдөр буюу 2025 оны долдугаар сарын 30-ны өдрийн өглөөний 08:25 цаг орчимд ОХУ-ын Камчаткийн хойгт 8.7 магнитудын асар хүчтэй газар хөдлөлт боллоо.

Уг газар хөдлөлтөөс үүссэн 1-3 метрийн цүнами Япон Улсын Хоккайдо мужаас Вакаяма мужийг хүртэлх Номхон далайн эргийг 10:00-13:00 цагт дайрах төлөвтэй байгаа талаар Япон Улсын Засгийн газрын холбогдох байгууллагууд “Цунамигийн сэрэмжлүүлэг”-ийг зарлаад байна.

Эн Эйч Кэй болон олон нийтийн хэвлэл мэдээллийн хэрэгслээр тус цүнамигийн талаарх мэдээг тасралтгүй мэдээлж, иргэдийг аюулгүй байдлаа хангахыг анхааруулж байна. Иймд манай иргэдээс Номхон далайн эрэг орчимд нам дор газар амьдардаг, аялал жуулчлалаар дээрх бүсэд зорчиж байгаа бол яаралтай урьдчилан сэргийлэх, нүүн шилжих арга хэмжээ авна уу.

Японы Метеорологийн Агентлагаас хийлгэсэн хэвлэлийн бага хурлын үеэр Газар хөдлөлт, цунамитай тэмцэх асуудлын арга зүйч Ш.Киёмото иргэдэд хандан "Далайн эргийн бүсүүд болон далайд цутгадаг голын дагуу оршин суудаг иргэд өндөрлөг газар буюу бөх бат барилгын дээд давхар гэх мэт аюулгүй газарт нүүн шилжих”-ийг зөвлөв.

Тэрбээр "Цунамигийн эхний давлагаа 10:00 цаг орчимд ирнэ. Цунамигийн давлагаанууд ар араасаа удаан хугацаанд давтагдах ба эхний давлагаанаас араас ирэх давлагаанууд илүү том байх магадлалтай. Иймд цунамигийн сэрэмжлүүлэг хүчингүй болох хүртэл анхаарал болгоомжтой байж, нүүн шилжсэн хэвээр байхыг зөвлөж байна" гэжээ.

Цүнамигийн мэдээг Японы олон нийтийн “Эн Эйч Кай” телевизийн сайтаас орж, англи хэл дээр олж үзэж болно.

https://www3.nhk.or.jp/.../en/news/weather-disaster/tsunami/

Мөн доорх холбоосоор орж, гамшгаас сэргийлэх аппликэйшн гар утсандаа суулгах боломжтой.

https://www3.nhk.or.jp/news/news_bousai_app/

Эх сурвалж: Токио дахь Монгол Улсын Элчин Сайдын Яамны Консулын хэлтэс

Анхааруулга

Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!