Японы сөрөг хүчний Ард Түмний Төлөө Ардчилсан Намын дарга Юичиро Тамаки бусдыг хүйсээр ялгаварлан гадуурхсан агуулгатай үг хэлснийхээ төлөө өчигдөр олон нийтээс уучлал гуйжээ.
Тэрбээр Мягмар гарагт Токио хотод болсон хэвлэлийн хурлын үеэр нам нь яагаад эмэгтэйчүүдийн дэмжлэгийг хангалттай авч чадахгүй байгаа талаар сэтгүүлчийн асуултад хариулсан юм.
“Манай бодлого зөвхөн эрэгтэйчүүд төдийгүй эмэгтэйчүүдэд ч өгөөжтэй гэж үзэж байгаа. Гэхдээ тэдэнд үүнийг ойлгох маш хэцүү байгаа гэж би бодож байна” гэж тэр хариулжээ.
Сангийн яаманд өндөр албан тушаал хашиж байсан Тамакигийн нам иргэдийн орлогыг нэмэгдүүлэх эдийн засгийн бодлого хэрэгжүүлэх амлалт авсан нь эмэгтэйчүүдээс илүү эрэгтэй ажилчдын дунд нэлээд дэмжлэг авсныг саяхан хэвлэлээр явуулсан судалгааны үр дүн харуулсан юм.
Харвардын Их сургуулийн магистр Тамаки өчигдөр сошиал хуудсандаа “Би буруу зүйл хэлсэндээ харамсаж, чин сэтгэлээсээ уучлал гуйж байна. Надад эмэгтэй хүнийг ялгаварлах үзэл бодол байхгүй” гэж бичжээ.
Тамаки сүүлийн үед ярьсан зүйлийнхээ төлөө нэлээд хэл аманд орооцолдож байгаа.
Тавдугаар сард тэр засгийн газрын нөөцийн цагаан будааг “нэг жилийн дотор малын тэжээл болох зүйл” гэж хэлээд буруудсан юм.
Эх сурвалж: Kyodo News
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
12 СЭТГЭГДЭЛТЭЙ
|