ДЭМБ: Электрон тамхи нь "зугаатай, аюулгүй" гэсэн ташаа ойлголтыг тарааж, эрүүл мэндийн ноцтой аюулыг нуун дарагдуулж байна
Монгол Улсад жил бүр ойролцоогоор 4,300 хүн тамхины хэрэглээний улмаас нас бардаг.
Үүнтэй тэмцэхийн тулд бодлогоор “Тамхины хяналтын тухай хууль”-д нэмэлт, өөрчлөлт оруулж тамхины эсрэг тэмцлээ эрчимжүүлж байгаа.
Янжуур тамхинаас гадна электрон тамхи буюу вэйп нь, ялангуяа залуучуудын дунд эрчимтэй тархаж буй нь нийгмийн эрүүл мэндийн ноцтой аюул болоод байгааг Дэлхийн Эрүүл Мэндийн Байгууллага (ДЭМБ)-аас анхаарууллаа.
Электрон тамхи нь хүний эрүүл мэндэд хортой төдийгүй энэ нь тамхинаас гарах арга биш юм.
Эдгээр бүтээгдэхүүнийг хүүхэд, залуус руу чиглэсэн маркетинг, чихрийн амт, ганган дизайн, тоглоомчилсон урамшуулал, нөлөөлөгчдийг ашиглан нийгмийн сүлжээнд хүч түрэн сурталчилж байна. Үүний үр дүнд электрон тамхи нь "зугаатай, аюулгүй" гэсэн буруу ташаа ойлголтыг тарааж, эрүүл мэндийн ноцтой аюулыг нь нуун дарагдуулж байна.
Электрон тамхи хүний эрүүл мэндэд дараах сөрөг нөлөөтэй:
- Өсвөр насныхны тархины хөгжлийг сааруулж, сэтгэл түгших, суралцахад бэрхшээлтэй болгох эрсдэл нэмэгдүүлдэг.
- Никотинд донтох хамаарлыг бий болгож, насан туршийн хорт зуршилд донтоход хүргэдэг.
- Уушги болон зүрх судасны тогтолцоонд хортой нөлөөтэй.
- Залуусын дунд уламжлалт тамхи татах донтолтыг гурав дахин нэмэгдүүлдэг.
ДЭМБ-ын Монгол дахь Суурин төлөөлөгчийн газартай хамтарсан судалгааны үр дүн:
- Судалгаанд оролцсон хүүхэд залуусын ойролцоогоор 60% нь электрон тамхи хэрэглэж үзсэн.
- Гурван хүүхэд тутмын нэг нь электрон тамхи тогтмол хэрэглэж байна.
- Тогтмол хэрэглэгчдийн таван хүн тутмын нэг нь өдөрт 10 ба түүнээс дээш удаа татдаг буюу донтолтын шат руу орсон.
- 2024 онд электрон тамхины импорт огцом өсөж, нийт тамхины импортын бараг 25%-ийг дангаар эзэлжээ.
Эдгээр ноцтой мэдээллийг 2025 оны тавдугаар сарын 14–15-ны өдрүүдэд Улаанбаатар хотноо зохион байгуулагдсан өндөр түвшний уулзалтаар танилцуулсан.
Одоогоор Монгол Улсад электрон тамхийг хамруулсан нэгдсэн зохицуулалт байхгүй. Үүнийг уламжлалт тамхины нэгэн адил хатуу хяналт, хүүхэд залуучууд, бүх нийтийг хамарсан хориглох бодлогоор зохицуулах шаардлагатай байна.
Бодлогын арга хэмжээ яаралтай авахгүй бол электрон тамхины хэрэглээ Монголын хүүхэд, залуу үеийн дунд гүнзгий нэвтэрч, олон мянган хүнийг насан туршийн донтолт, эрүүл мэндийн ноцтой эрсдэлд хүргэх аюул нүүрлээд байгааг ДЭМБ-аас анхааруулав.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
