Эгэл даруу амьдралаараа алдаршсан Уругвайн ерөнхийлөгч асан 89 насандаа таалал төгслөө

Эгэл даруу амьдралаараа дэлхий дахинд алдаршиж байсан Уругвай улсын ерөнхийлөгч асан Хосе Мухика өчигдөр 89 насандаа таалал төгсжээ.

“Бидний найз нөхөр Пепе Мухика таалал төгссөнд гүнээ харамсаж байна” гэж Уругвайн ерөнхийлөгч Яманду Орси сошиал хуудсаараа зарласан байна.

“Тэр ерөнхийлөгч, тэмцэгч, удирдагч, халамжлан хүмүүжүүлэгч байсан юм. Эрхэм настан таныг бид маш их үгүйлэх болно. Таны бидэнд өгсөн бүх зүйлс болон ард түмнээ хайрласан хайранд маш их баярлалаа” гэж тэр цааш нь бичжээ.

Партизан асан Мухика ерөнхийлөгч байхдаа улс орноо ордноос биш, хөдөөгийн жижиг тосгоноос удирддаг байсан юм.

Тэрбээр сүүлийн нэг жил гаруй хугацаанд хорт хавдартайгаа тэмцэж байжээ.

“Би үзэл бодолдоо үнэнч байж, нөхөдтэйгөө хамт тэмцлээ үргэлжлүүлэхийн хажуугаар ногоо тарьж, тахиануудаа тэжээсээр байх болно” гэж тэр хамгийн сүүлд хэвлэлд ярьж байв.

Пепе хочит Мухика 1960-аад оны үед зүүнтний партизаны бүлэг Тупамаросын удирдагч болж, улс орондоо Куба маягийн хувьсгал хийх зорилгоор засгийн газрын эсрэг тэмцэж байжээ.

Эцэст нь 1970-аад оны үед Уругвайн цэргийн дэглэм тэднийг дарж, Мухика 15 орчим жил шоронд хоригдохдоо нэлээд зовлон амссан байна.

Мухика 1985 онд Уругвайд ардчилсан засаглал тогтсоны дараа шоронгоос суллагдаж байжээ.

Үүнээс хойш дөрвөн жилийн дараа тэр партизан нөхдийнхөө хамт Ард Түмний Оролцооны Хөдөлгөөн нэртэй нам байгуулж, хууль тогтоох байгууллагын сонгуульд хэд хэдэн удаа ялалт байгуулсан юм.

2009 онд Мухика ерөнхийлөгчийн сонгуульд нэр дэвшиж, хоёр дахь шатанд 50 гаруй хувийн саналаар ялж байжээ.

Түүний засаглалын 2010-2015 онуудад Уругвайн эдийн засаг тэлж, нийгмийн хэд хэдэн дэвшилтэт шинэчлэлт нэвтэрч байв.

Тухайлбал үр хөндөлт, ижил хүйстнүүдийн гэрлэлтийг хуульчилж, Уругвай каннабисыг зугаа цэнгээний зорилгоор хэрэглэхийг зөвшөөрсөн дэлхийн анхны улс болж байжээ.

 

2012 онд тэр CNN сувгийн нэвтрүүлэгт оролцохдоо ажиллаж, амьдардаг фермээ танилцуулж, ургуулсан жимс, ногоогоо үзүүлж, хуучин Volskwagen Beetle автомашинаараа зугаалж байв.

Мухикаг тухайн үед “дэлхийн хамгийн ядуу ерөнхийлөгч” хэмээн нэрлэж байжээ.

2014 онд хэвлэлд ярихдаа тэр “Би ядуу ерөнхийлөгч биш. Ядуу хүн гэж амьдралд нь маш их зүйл хэрэгтэй байгаа хүнийг хэлдэг юм. Миний үзэл бодол Сенекагийн философи. Би бол гэгээрсэн ерөнхийлөгч. Би ерөнхийлөгч болохоосоо олон жилийн өмнөх амьдралаараа одоо ч амьдарч байгаа тул их зүйл хэрэггүй. Би яг л хуучнаараа амьдарч байна. Би ард түмнийхээ ихэнхийн амьдралаар амьдарч байна” гэж хэлж байв.

2024 оны дөрөвдүгээр сард Мухика улаан хоолойн хорт хавдартай болсон нь оношлогдож байжээ.

Энэ оны нэгдүгээр сард тэр эмчилгээнээс татгалзаж, амьдралынхаа үлдсэн хугацааг ганцаар өнгөрөөхөөр шийдэж байв.

Эх сурвалж: CNN