1972 онд хөөргөсөн Зөвлөлтийн сансрын хөлөг удахгүй дэлхийн хаа нэгтээ унаж магадгүй болжээ

1970-аад оны үед Сугар гарагт буух зорилготой байсан ч бүтэлгүйтсэн Зөвлөлтийн сансрын хөлөг удахгүй дэлхий дээр унах гэж буйг мэргэжилтнүүд мэдээлжээ.

Хагас тонн жинтэй энэхүү металл дэлхийн агаар мандалд хаагуур орж ирэх, газарт хүрэхдээ хэчнээн хувь нь шаталгүй үлдэхийг хэлэхэд эрт байгааг сансрын хог хаягдал судлаачид хэлж байна.

Нидерландын судлаач Марко Лангброк хөлгийг тавдугаар сарын 10-ны орчим агаар мандалд орж ирэхдээ 242 км/цаг хурдтай байна гэж тооцоолжээ.

“Эрсдэлгүй гэж хэлж чадахгүй ч хэт санаа зовох шаардлагагүй” гэж Лангброк хэлсэн байна.

Учир нь хөлөг харьцангуй жижиг хэмжээтэй тул агаар мандалд бүрэн шатахгүй байсан ч үлдэгдэл нь унахдаа манай дэлхийд жил бүр хэд хэдэн удаа тохиолддог солир унахтай адил нөлөө үзүүлэх гэнэ.

“Эрсдэл нь хүн амьдралынхаа турш аянгад ниргүүлэх эрсдэлээс ч бага” гэж Лангброк дүгнэжээ.

Зөвлөлт Холбоот Улс 1972 онд Космос 482 нэртэй сансрын хөлөг хөөргөсөн нь Сугар гарагийг судлах зорилготой байсан байна.

Гэвч пуужинд гэмтэл гарсны улмаас хөлөг дэлхийн тойрог замаас гарч чадаагүй ажээ.

Хөлгийн ихэнх хэсэг арван жилийн дотор дэлхийн агаар мандалд орж ирээд устсан юм байна.

Харин нэг метр диаметртэй бөмбөрцөг хэлбэрийн капсул нь сүүлийн 53 жилийн турш зууван хэлбэртэй замаар дэлхийг тойрон эргэхдээ аажмаар өндрөө алдаж байжээ.

Сугар гарагийн нүүрстөрөгчийн давхар ислээр баялаг атмосферийг зүсэх чадвартай байхаар тооцож бүтээсэн тул дэлхийн агаар мандалд бүрэн шаталгүй үлдэх магадлалтай юм байна.

Гэхдээ олон жил тойрог замд байсан тул хамгаалалтын гадаад бүрхүүл нь нэлээд муудсан байж болзошгүй гэж судлаачид үзэж байгаа ажээ.

Эх сурвалж: Associated Press