"2024 оноос хойш тархины үхэлтэй донор огт ирсэнгүй. Нэг эмчийн асуудлын ард олон хүний амь нас яригдаж байна"
Хавдар Судлалын Үндэсний Төв (ХСҮТ)-ийн эмч нар донор ба эрхтэн шилжүүлэн суулгах мэс засалтай холбоотой асуудлаар өнөөдөр хэвлэлийн хурал зарлалаа.
Энэ үеэр ХСҮТ-ийн Эмнэл зүй эрхэлсэн дэд захирал С.Хүрэлсүх "ХСҮТ элэг шилжүүлэх хагалгааг 2011 онд БНСУ-ын Самсунг эмнэлэгтэй хамтын ажиллагааны гэрээ байгуулж, эмч нараа бэлдэж эхэлсэн.
Дан ганц мэс заслын эмч нар биш, эрчимт эмчилгээ, унтуулгын эмч нар, лабораторийн эмч нар зэрэг давхардсан тоогоор 70 гаруй эмчийг найман жилийн хугацаанд бэлдээд буй. Мөн тоног төхөөрөмж шинэчлэх болон бусад төслүүдэд ч оролцож байсан.
Эрхтэн шилжүүлэн суулгах төслүүд болон эд, эрхтэн шилжүүлэх хуулийн заалтад П.Батчулуун эмчийн дуу хоолой өндөр. Бид ажлын хэсэгт хамт ажиллаж явсан.
Амралт, ажил, өдөр, шөнө аль ч тохиолдолд амьгүй донор гардаг. Хамгийн түрүүнд эмч нар, дарга нар бүгдийнх нь утас нээлттэй байх ёстой.
П.Батчулуун эмчээс дуудлага орж ирэхэд энд нэг донор гарч дээ гэж бодно. Эхлээд надад “Багаа бэлдээрэй” гэж мэдэгдэнэ. Энэ дагуу багийн ахлагчид нь багаа бэлдэнэ.
Тархины үхэлтэй хүн болгон донор болдоггүй. Олон төрлийн шинжилгээ, оношилгоо хийж шийддэг.
Хоёр шатны шүүх хурлын ажиллагаа болсон. Энэ хүний эрүүл мэнд тааруу байгаа.
Энэ бол нэг эмчийн асуудал биш. Бүх эрүүл мэндийн салбарт, тэр дундаа эрхтэн шилжүүлж байгаа эмнэлгүүдийн ажил доголдож байна.
2024 оноос хойш тархины үхэлтэй донор огт ирсэнгүй. Үүний ард эмчилгээгээ хүлээж байгаа, эрхтэн шилжүүлэн авах найдлагатай олон мянган монгол хүн, ар гэр хүлээж байна.
Нэг эмчийн асуудлын ард олон хүний амь нас байгаа шүү" гэлээ.
"Ард иргэдэд эрхтэн шилжүүлэн суулгах хагалгаатай холбоотой зөв мэдээлэл олгоё"
ХСҮТ-ийн Элэг, цөс, нойр булчирхайн мэс засал, эрхтэн шилжүүлэн суулгах төвийн дарга Г.Үнэнбат "Бид хууль зөв, буруу, хэн нэгний зөв, буруу гэж хэлэх гэсэнгүй.
Хэн нэгнийг өмгөөлөх асуудал яриагүй. Хамгийн гол нь үнэн мөн. Ард иргэдэд эрхтэн шилжүүлэн суулгах хагалгаатай холбоотой зөв мэдээлэл олгоё.
Эд, эс, эрхтэн шилжүүлэн суулгах үйл ажиллагааг өргөн дэлгэр тайлбарлах нөлөөллийн ажлыг зөв тал руу явуулъя гэсэн зорилготойгоор цугласан. Үнэн зөв мэдээллийг баталгаатай эх сурвалжаас авч байх хэрэгтэй байна.
Гол асуудал нь эд, эс, эрхтэн шилжүүлэн суулгах үндсэн баг өөрөө буруу үйл ажиллагаа явуулсан мэтээр харуулах гээд байгаа. Тархины үхэлтэй донор гараад тэр өдрийн хагалгаа хийсэн нийт багийнхныг ялтан болгож харагдуулж байгаад сэтгэл эмзэглэж байна.
Хагалгаанд оролцсон бүх хүн буруу юм хийсэн мэтээр П.Батчулуун эмчийг ялтай хэвээр байлгах гээд байгаад эргэлзэж байна" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
