Трамп автомашины импортын татварын хэрэгжилтийг хойшлуулахаар төлөвлөж байгаагаа зарлав

АНУ-д гадаадаас нийлүүлэгддэг бүх автомашин, автомашины эд ангиудад 25 хувийн импортын татвар ногдуулж байгааг ерөнхийлөгч Трамп энэ сарын эхээр зарласан билээ.

Тэгвэл Даваа гарагт тэр энэ шийдвэрийнхээ хэрэгжилтийг хойшлуулах талаар бодож буйг мэдээлжээ.

“Би зарим автомашин үйлдвэрлэгчдэд тустай зүйлийг хийхээр төлөвлөж байна. Тэд Канад, Мексик зэрэг бусад улсуудаас эд анги авдгаа болих хэрэгтэй болоод байгаа. Эд ангиудыг энд үйлдвэрлэдэг болоход бага зэрэг хугацаа шаардлагатай юм байна” гэж Трамп хэлсэн юм.

Трампын энэ мэдэгдлийн дараа өнөөдөр өглөө Азийн автомашин үйлдвэрлэгчдийн хувьцааны ханш өссөн байна.

Тухайлбал Toyota Motor 5.1 хувь, Honda Motor 4.7 хувь, Hyundai Motor 3.7 хувиар тус тус өсжээ.

Зөвхөн Азийнх ч биш, Америкийн үйлдвэрлэгчдийн ханш бас өссөн байна. Жишээлбэл Stellantis, General Motors компаниудын хувьцааны ханш тус бүр 5.6 ба 3.5 хувийн өсөлттэй Даваа гарагийн арилжааг хаажээ.

Өнгөрсөн долоо хоногийн сүүлээр Трамп бас гар утас, компьютер зэрэг электроник тоног төхөөрөмжүүдийг импортын өндөр татвараасаа чөлөөлөх болсныг зарласан юм. Ингэхдээ дэлхийн хамгийн том электроник үйлдвэрлэгч Хятад улсыг ч бас үүнд хамруулсан байна. Хятадын худалдааны яам үүнийг нь том алдаагаа засах "жижиг алхам" хэмээн тодорхойлж байв.

Автомашин үйлдвэрлэгчдийг худалдааны дайныхаа гадна үлдээх талаар ярьсны дараа Трамп “Намайг ямар их уян хатан хүн болохыг та нар харж байна уу. Миний санаа өөрчлөгдөхгүй, гэхдээ уян хатан байх болно” гэж хэлжээ.

Эх сурвалж: Business Insider