"Шинэ тойрог замын трасс баруун талдаа Станцын замаас эхэлж I хорооллын арын дэнжээс Баянхошуу хүртэл үргэлжилнэ"

Улаанбаатар хотын Шинэ тойрог зам төслийн 23.2 км урт авто замын трассыг дөрвөн хувилбартай боловсруулжээ. Урьдчилсан байдлаар Шинэ тойрог зам нь баруун талдаа Туулын хурдны замтай, зүүн талдаа Баянзүрхийн гүүр болон Төв аймаг руу туннелиэр холбогдох юм байна. Трассын дөрвөн хувилбарт бүгдэд нь газар чөлөөлөх нөлөөллийн тооцооллыг гаргасан байна.

Шинэ тойрог зам нэг талдаа гурав буюу нийт зургаан эгнээтэй баригдахаар төлөвлөгджээ. Тус төслийг хэрэгжүүлснээр явган хүн, унадаг дугуйн зам болон ногоон байгууламж зэргийг хослуулсан “Бүрэн гудамж” бий болох гэнэ.

Энэ тухай хотын дарга Х.Нямбаатар "Яармагаас Станц руу баригдсан замаас Хархорин худалдааны төв чиглэлд шинэ тойрог замын баруун эргэлтийн цэг байх юм. Уг худалдааны урд талын төвийн төмөр зам дээгүүр гүүрэн байгууламж барьснаар Барс-2 зах, Энхтайвны өргөн чөлөөгөөр гүүрээр давж Нэгдүгээр хорооллын арын дэнж буюу Содон хороололтой холбогдох босоо чиглэлтэй. Цааш Ханын материал, Баянхошуу хүртэл шинэ тойрог зам үргэлжилнэ. 

Шинэ тойрог зам төслийн ТЭЗҮ-ийг боловсруулсан компанийн гаргаж өгсөн трассын дагуу Яармагаас Нэгдүгээр хороолол хүртэл газар чөлөөлөлтийн нөлөөлөл харьцангуй багатай. Үерийн хамгаалалтын далан дотор гүүрэн байгууламжуудын суурь багана суурилагдах тул зарим айл газар чөлөөлөлтийн нөлөөлөлд өртөх хувилбар бий.

Шар шаврын Найрамдал орд, Баянхошууны тойргийн хажуугаар тавигдах тойрог замын нэгдүгээр хувилбар, 23.2 км урттай. Тойрог замын баруун хэсгийн туннель Баянхошууны наймдугаар хорооны нутаг дэвсгэрээс эхэлж, Самбалхүндэв уулын хойд бэлд туннелийн төгсгөлийн цэг байх юм. Туннель нь гурван километр үргэлжилнэ.

Тойрог болон Туулын хурдны замтай холбогдох эргэлтүүдийг хийснээр Улаанбаатар хотын нэг захаас нөгөө захад хүрэхэд 10 гаруй минут зарцуулах тооцоолол гарсан. Уг хоёр замыг төлөвлөсөн хугацаандаа ашиглалтад оруулбал замын түгжрэлийг 50%-аас илүү хувиар бууруулна.

Трассуудын эргэлтийн цэгийг тодорхойлох ажил хийгдэж байна. Давхар замын эргэлт, тойрох хэсгүүдийг ТЭЗҮ-д нарийн тусгах хэрэгтэй" гэв.

Шинэ тойрог замын трасс Яармагийн Эрчим хүчний гудамжаас эхэлж Нэгдүгээр хорооллын арын дэнж, Ханын материалын хойд хэсэг буюу Ган хийцийн тоосгоны хуучин үйлдвэрийн Сонгинохайрхан дүүргийн 8 дугаар хорооны нутаг дэвсгэрээс Чингэлтэй дүүргийн 21 дүгээр хорооны заагт 3 км урт туннель зургаан эгнээтэй явган хүний орц, гарцтай иж бүрэн төлөвлөгдөнө.

 

 

 

 

 

Зүүн талдаа ШШГЕГ-ын харьяа 407 дугаар хорих ангийн урд Ганц худгийн замын эргэх хэсэг болон “Да хүрээ” авто худалдааны төвийн уулзвараас гүүрэн байгууламжаар буюу хоёр түвшний авто замаар зорчиж, Туулын хурдны замтай шууд холбогдоно. “Жанжин клуб” соёлын ордон орчимд өндөр барилгууд олон, газар чөлөөлөлтийн төвөгшил их учраас мөн гүүрэн байгууламж үргэлжилж, Туулын хурдны зам руу холбогдох юм байна.

Газар чөлөөлөлтийн нөлөөлөл бага, гүйцэтгэх ажлын зардлыг хэмнэсэн, Дамбадаржаа, Сэлбэ, Шархад, Амгалан дэд төвийн ачааллыг хуваалцах байдлаар трассын төлөвлөлтүүд хийгджээ.

Замын ТЭЗҮ-ийг боловсруулж, зөвлөх үйлчилгээ үзүүлж буй “Си Эс Си И Си Айком консалтантс” ХХК нь БНХАУ-ын Шинжлэх ухааны академитай хамтарч байгаа бөгөөд зургаадугаар сард ТЭЗҮ-ийг эцэслэн боловсруулж, холбогдох мэргэжлийн зөвлөлүүдээр хэлэлцүүлэхээр төлөвлөжээ.