NBA-ийн тоглолтуудын шууд дамжуулалтын эрх дэлхий даяар өөрчлөгджээ

NBA лиг дэлхийн хэмжээнд дамжуулалтын эрхийн шинэ гэрээ байгуулсантай холбоотойгоор плейофф болон финалын тоглолтуудын дамжуулалтын зохицуулалтад өөрчлөлт орсон тухай албан ёсны мэдээлэл гарчээ. Тодруулбал, Amazon Prime Video платформтой байгуулсан олон улсын хэмжээний дамжуулалтын гэрээний хүрээнд зарим тоглолт тодорхой платформ дээр онцгой эрхтэйгээр дамжуулагдахаар болсон байна.

Энэхүү зохицуулалт нь NBA‑ийн олон улсын дамжуулалтын стратеги, контент түгээх шинэ бүтэцтэй уялдсан бөгөөд тухайн бүс нутагт үзүүлэх эрхийг гэрээний нөхцөлийн дагуу тодорхой платформд олгож байгаа аж. Үүний улмаас өмнө нь зэрэг дамжуулж байсан зарим стриминг болон телевизийн сувгуудаар NBA‑ийн финалын болон шийдвэрлэх шатны тоглолтыг шууд дамжуулах боломжгүй болжээ.

 

NBA‑ээс мэдээлснээр энэхүү өөрчлөлт нь тодорхой нэг улс, зах зээл, эсвэл компанид чиглэсэн шийдвэр бус бөгөөд дэлхий даяар мөрдөгдөх дамжуулалтын эрхийн нэгдсэн бодлогын хүрээнд хэрэгжиж байгаа юм. Шинэ гэрээ нь лигийн дижитал хүртээмжийг тэлэх, олон улсын үзэгчдэд илүү чанартай дамжуулалт, нэмэлт контент (онцгой камерын өнцөг, аналитик, нэмэлт студи контент зэрэг) хүргэх зорилготой гэж тайлбарласан байна.

Сүүлийн жилүүдэд дэлхийн спортын контент түгээлтийн орчин эрчимтэй өөрчлөгдөж байгаа бөгөөд үүний томоохон жишээ нь NBA‑ийн шинэ медиа эрхийн бодлого юм. Тус лиг нь 2024 онд 11 жилийн хугацаатай, ойролцоогоор 76 тэрбум ам.долларын нийт дүн бүхий шинэ гэрээг дэлхийн тэргүүлэгч медиа байгууллагуудтай байгуулж, уг гэрээг 2025–2026 оны улирлаас эхлэн хэрэгжүүлж байна. Энэхүү өөрчлөлтийн хүрээнд NBA‑ийн контент түгээлт олон платформд хуваагдаж, стриминг болон уламжлалт телевизийг хослуулсан шинэ экосистем бүрдэж байгаа нь дэлхий даяарх бүх зах зээлд ижил түвшинд нөлөөлж байна.

Иймд сагсан бөмбөг сонирхогч, үзэгч, хэрэглэгчдийн дунд үүсэж буй ойлгомжгүй байдал нь тухайн орон нутгийн телевиз, платформын шийдвэр бус, харин олон улсын түвшний гэрээ, эрхийн хуваарилалттай шууд холбоотой гэдгийг албаныхан онцолжээ.

Энэ нь манай улсын шууд дамжуулалтад хэрхэн нөлөөлж байгаа вэ?

Дээр дурдсан дэлхийн хэмжээний өөрчлөлттэй уялдуулан, манай улсын спортын сувгуудаар шууд дамжуулах NBA тоглолтын тоо, төрөлд тодорхой өөрчлөлт орж байгаа нь албан ёсны хэрэг юм. Тухайлбал, 2025–2026 оны улиралд дараах тоглолтууд нь одоогийн байдлаар манай шууд дамжуулалтын хуваарьт багтахгүй байгаа юм байна. Үүнд:

• 2026 оны Play‑In шатны тоглолтууд
• 2026 оны Баруун бүсийн шигшээ тоглолтууд
• 2026 оны NBA‑ийн Шигшээ (Finals) шатны тоглолтууд

Эдгээр тоглолтын дамжуулалтын эрх нь NBA‑ийн олон улсын шинэ гэрээний хүрээнд тодорхой платформд онцгой эрхтэйгээр хамаарах болсон тул уг өөрчлөлт нь манай улсын зүгээс гаргасан шийдвэр биш болохыг дахин онцлох нь зүйтэй.

Эх сурвалж:
NBA Communications – NBA‑ийн дэлхийн дамжуулалтын эрхийн шинэ гэрээний талаарх албан ёсны мэдэгдлийг ЭНД дарж харна уу.