Малайз улсад байгалийн хийн хоолой дэлбэрсний улмаас 100 гаруй хүн шархдаж, 49 амины орон сууц шатав

Өчигдөр Малайз улсын нийслэл Куала-Лумпур хотын захад оршдог байгалийн хийн хоолой дэлбэрсний улмаас 100 гаруй хүн шархдаж, 49 амины орон сууц шатжээ.

Тэнгэр баганадсан их гал олон цагийн турш үргэлжлэн шатаж, нэлээд хэдэн километрийн холоос харагдаж байлаа.

Хүн амын дийлэнх нь муслим Малайз улсад өчигдөр Исламын шашны Рамадан сарын төгсгөлийг тэмдэглэдэг Эйд баярын хоёр дахь өдөр буюу бүх нийтийн амралтын өдөр байсан юм.

Тус улсын үндэсний газрын тосны компани Петронас өглөөний 8:10 цагийн үед байгалийн хий дамжуулах нэг хоолойд нь гал гарч эхэлснийг мэдээлжээ.

Оргил үедээ 20 давхар байшингийн хэмжээнд хүрсэн галын дөл өдрийн 2:45 цагийн үед л гал сөнөөгчид ойртох боломжтой хэмжээнд хүрч буурсан байна.

 

Нийт 112 хүн шархдаж, гэмтсэний 63 нь түлэгдэл, угаарталт болон бусад шалтгааны улмаас эмнэлэгт хүргэгджээ. Нийт 49 амины орон сууц түймрийн улмаас шатаж, гэмтсэн байна.

Нөхцөл байдлыг хяналтдаа авах хүртэл ойролцоо амьдардаг иргэдийг нүүлгэн шилжүүлэх арга хэмжээ авчээ.

Петронас компани энэ ослын дараа аюулаас сэргийлэх зорилгоор байгалийн хий түгээх гурван станцаа түр хаасан байна. Гал түймрийн шалтгааныг тогтоох ажил эхэлснийг Малайзын эрх баригчид мэдээлжээ.

Эх сурвалж: Associated Press