"Ганц хоёр килограмм төмөр, ширхгээр шил зөөдөг хүмүүс Улаанчулуутын хогийн цэг дээр авчирч өгөх үү"

Нийтийн эзэмшлийн талбай дээр болон орон сууцны хорооллын дунд төмрийн хог, хоёрдогч түүхий эд авах, машины сэлбэг зарах үйл ажиллагаа явуулахыг зөвшөөрөхгүй гэж хотын дарга өнгөрсөн онд мэдэгдэж байв. Тодруулбал Сонгинохайрхан дүүргийн 20 дугаар хороо, Цэргийн хотхонд орон сууцны хороолол дунд газраа зориулалтын бусаар ашиглаж, хоёрдогч түүхий эд цуглуулж, машины сэлбэг зарж буй, мөн дүүргийн 20 дугаар хорооны нутаг дэвсгэрт Сонсголонгийн уулзварын хойд эгнээнд сэлбэг зарж буй айлуудад тохижилтын нэгдсэн зураг гаргаж өгөөд тохижуулж чадахгүй бол газраа төр буцааж авна гэсэн юм.

Уг асуудлаар буюу Сонгинохайрхан дүүргийн нутаг дэвсгэрт газраа зориулалтын бусаар ашиглаж, хоёрдогч түүхий эд цуглуулан борлуулж буй иргэн, аж ахуйн нэгжийн төлөөллүүдтэй нүүлгэн шилжүүлэх талаар өнөөдөр санал солилцож, хэлэлцүүлэг өрнүүлжээ.

Энэ тухай тус дүүргийн Засаг дарга Ц.Баттөр "Хоёрдогч түүхий эд цуглуулж, худалдан борлуулж байгаа цэгүүдэд ажиллаж, бүтэн жилийн хугацаанд шаардлага тавьсан. Газар эзэмших эрхээ гэрээнд тусгагдсаны дагуу ашиглах хангалттай хугацааг олгосон. Харамсалтай нь иргэд ямар нэг арга хэмжээ авсангүй.

Дүүрэг, орон нутгийн захиргааны байгууллага дээр ирж, гэрээ байгуулан цэгийг нүүлгэн шилжүүлэх ажлыг зохион байгуулж, шинээр цэгээ тодорхойлуулах санал гаргасангүй.

Иргэн, ААН санал тавихгүй бол хоёрдогч түүхий эд авах, худалдан борлуулах цэгийг зааж өгч, хуулийн хүрээнд газрыг газраар солих зөвшөөрлийг өгнө. 

Манай дүүрэгт хоёрдогч түүхий эд цуглуулж, худалдан борлуулах 35 цэг бий. Та бүхний саналыг сонсоно" гэв.

"Дахивар бэлтгэн нийлүүлэх цэгүүд ТББ" холбооны УЗ-ийн дарга н.Отгонбаяр: Дахиврын талаар НЗДТГ, Байгаль орчин, уур амьсгалын өөрчлөлтийн яамтай энэ өвөл уулзалтуудыг зохион байгуулсан юм. Хоёрдогч түүхий эд цуглуулж, худалдан борлуулж байгаа цэгүүд ямар хууль, тогтоомжийг зөрчөөд байгааг хэлээд өгөөрэй.

Сонгинохайрхан дүүргийн Засаг дарга Ц.Баттөр "Газрын тухай хуулийн 28.1.3, 35.1-д иргэн, ААН, байгууллага улсаас эзэмших, ашиглах, өмчлөх зориулалтаар авсан газрыг өмчлөх бол амьдрах, худалдаа үйлчилгээ эрхлэх бол худалдаа үйлчилгээний, барилга байгууламж барих бол эзэмших зориулалтаар авна гэж заасан байдаг. Газрын гэрчилгээ дээр хийж болох зөвшөөрөгдсөн заалтыг тусгадаг.

Газар дээрээ гэрээнд тусгагдаагүй үйл ажиллагаа явуулж байгаа бол хуулийн дагуу газрыг газраар солих, нөхөн олговортойгоор чөлөөлөх процесс явагдана. Хэрэв энэ үндэслэлийг хүлээн зөвшөөрөхгүй бол холбогдох хуулийн дагуу албадан нүүлгэн шилжүүлдэг. Иргэд эвлэлдэн нэгдэж, ТББ байгуулж тодорхой чиглэлээр хамтарч ажиллах нь зөв. Төрийн Бус Байгууллага нь иргэн, нийгэмд үйлчлэх үйл ажиллагаа эрхлэхийг дэмжинэ. Гэхдээ иргэдийн оршин суух, амьдрах эрхийг хязгаарлаж болохгүй гэдэг заалт зөвшөөрөл олгоход тавигддаг.

Улаанчулуутын хогийн цэг дээр хоёрдогч түүхий эд авах цэгүүдийг байршуулахаар газар төлөвлөж байгаа" гэв.

Хоёрдогч түүхий эд цуглуулан борлуулж буй иргэн, аж ахуйн нэгжийн төлөөллүүдийн санал:

• Улаанчулуутын хогийн цэг дээр хоёрдогч түүхий эд авах цэгүүдийг төвлөрүүлчихээр ганц хоёр килограмм төмөр, ширхгээр шил зөөдөг хүмүүс тэнд аваачиж өгөх үү. Эсвэл одоо цэгүүдийн байгаа орчинд битүү байшинд үйл ажиллагаа явуулах стандарттай болгох шийдэл байхгүй юу.
• Эзэмшиж байгаа газар дээрээ том сэндвичин барилгад гадна талдаа төмөр овоолохгүй, оройдоо хураагаад аваад явдаг, дотор нь агааржуулах системтэй, иргэдэд аюул учруулахгүйгээр үйл ажиллагаа явуулах стандарттай болгох саналтай байна гэв.

"Эдгээр саналыг энэ долоо хоногт хотын захиргааны албан тушаалтнуудад уламжилж, ирэх долоо хоногт эргэж уулзалт зохион байгуулна. Гэхдээ 2025 оны тавдугаар сарын 1-ний дотор хоёрдогч түүхий эд авах, худалдан борлуулах цэгүүдийг нүүлгэн шилжүүлэх ажлыг зохион байгуулна" гэдгийг дүүргийн Засаг дарга хэллээ.