Хятадын арми Тайвань арлын орчимд байлдааны сургуулилалт эхлүүлж, ерөнхийлөгчийг нь “шимэгч” хэмээн хочлов

Хятадын Ардын Чөлөөлөх Арми өнөөдөр өглөө Тайвань арлын орчимд байлдааны томоохон сургуулилалт эхлүүлжээ.

Тэнгисийн болон агаарын зэвсэгт хүчин, пуужингийн анги нэгтгэлүүд оролцож буй уг ажиллагааг “Тайванийг тусгаар тогтнуулах санаархлын хариуд хатуу анхааруулга өгөх зорилготой” гэж Ардын Чөлөөлөх Армийн зүүн тойргийн командлалын хэвлэлийн төлөөлөгч Ши И мэдэгдсэн байна.

Өнгөрсөн сард Тайванийн ерөнхийлөгч Лай Чин Тэ хэлсэн үгэндээ эх газрын Хятадыг “гадаадын дайсагнагч хүч” хэмээн нэрлэж байсан юм.

Хятад улс нь Тайванийг өөрийн нутаг дэвсгэрийн салшгүй хэсэг гэж үздэг бөгөөд шаардлагатай бол зэр зэвсгийн хүчээр нэгтгэхээ байнга анхааруулдаг.

Харин Тайванийн ард иргэдийн олонх нь Бээжингийн захиргаанаас тусдаа ардчилсан замаар хөгжихийг дэмждэг юм.

Байлдааны сургуулилалт эхэлсний дараа Хятадын арми хэд хэдэн суртал нэвтрүүлгийн агуулгатай дүрс бичлэгийг олон нийтэд цацжээ.

Нэг дүрс бичлэгт нь Тайванийн ерөнхийлөгчийг шимэгч хорхой үржүүлдэг энимэйшн киноны баатар мэтээр дүрсэлсэн байна.

“Тайвань арлыг шимэгчид хордуулж байна. Шимэгч хорхойнууд сүйрэл дагуулж байна” гэсэн өгүүлбэрүүдийг дээрх бичлэгт оруулжээ.

Тайванийн Үндэсний Батлан хамгаалах яам сүүлийн 24 цагийн хугацаанд арлын орчмын тэнгисийн усанд Хятадын 19 байлдааны хөлөг илрүүлснээ мэдээлсэн байна.

Бямба гарагт Тайванийн хяналтын бүсэд нэвтэрсэн Хятадын флотын Шаньдун нисэх онгоц тээвэрлэгч тэргүүтэй цохилтын бүлгийн хөдөлгөөнийг ажиглаж байгаагаа бас мэдээлжээ.

“Эдгээр үйлдлүүд нь бүс нутгийн энх тайван, тогтвортой байдалд заналхийлж байгааг би онцлон хэлмээр байна” гэж Тайванийн батлан хамгаалахын сайд Вэллингтон Коо мэдэгдсэн байна.

Гуравдугаар сарын дундуур Хятадын арми мөн томоохон байлдааны сургуулилалт зохион байгуулахдаа Тайвань арлын зүг олон тооны тэнгисийн хөлөг, нисгэгчгүй онгоц илгээж байв.

Иргэний дайны үр дүнд 76 жилийн өмнө Тайвань арал эх газрын Хятадаас тусгаарласан бөгөөд сүүлийн жилүүдэд талуудын харилцаа улам муудаж, засгийн газар хоорондын харилцаа тасраад байгаа юм.

Эх сурвалж: Reuters