Ром хотод Теслагийн худалдааны танхимын гадна 17 автомашин шатаасан хэргийг Маск “терроризм” гэж нэрлэлээ

Ням гарагийн шөнө Италийн нийслэл Ром хотын зүүн захад оршдог Тесла компанийн худалдааны танхимд гал гарч, зогсоолд нь байсан 17 шинэ автомашин шатжээ.

Уг гал түймрийн цаана хорлон сүйтгэх ажиллагаа байж болзошгүй гэж Италийн цагдаагийн газар сэжиглэж байгаа юм байна.

Тэгвэл Тесла компанийн гүйцэтгэх захирал Илон Маск өчигдөр сошиал хуудсандаа энэ үйл явдлыг “терроризм” гэсэн ганцхан үгээр тодорхойлон бичжээ.

Ням гарагийн шөнийн 4:30 цагийн үед гарсан галд худалдааны танхимын зарим хэсэг шатсан ч хүний амь нас, эрүүл мэнд хохироогүй юм байна.

Италийн барууны үзэл баримтлалтай Лига намаас томилогдсон засгийн газрын шадар сайд Маттео Салвини дээрх үйлдлийг буруутгасан мэдэгдлийг сошиал хуудсандаа нийтэлсэн байна.

“Тесла компанийг үзэн ядах явдал хэтэрч байна. Үзэн ядалт, зөрчил мөргөлдөөнөө аль болох хурдан дуусгах хэрэгтэй. Илон Маск болон халдлага, дарамтад өртөж буй түүний бүх ажилтнуудтай би эв санааны нэгдэлтэй байна” гэж Салвини мэдэгджээ.

Сүүлийн үед тэрбумтан Илон Маскийн улс төрийн үзэл баримтлал, Трампын засаг захиргаанд гүйцэтгэж буй ажил үүрэгт бухимдсан хүмүүс түүний гол хөрөнгө болох Тесла компанид санхүүгийн хохирол учруулах зорилготой  үйл ажиллагаа явуулах болсон нь зөвхөн АНУ-аар хязгаарлагдахаа больж, Канад болон Европын орнуудад өргөжөөд байгаа юм.

Эх сурвалж: Reuters