Д.Оргил: Agro Expo үзэсгэлэнд бид өөрсдийн нийлүүлдэг бүтээгдэхүүн үйлчилгээ, тоног төхөөрөмжийг танилцуулан оролцоно

Дэлхийн улс орнуудын төдийгүй, Монгол улсын худалдааны урсгал эрчимтэй нэмэгдэж байгаа энэ цаг үед харилцаа холбоог нэмэгдүүлэх, мөнгөний урсгалыг сайжруулах, хамтын ажиллагааг өргөтгөх үүднээс олон улсын арга хэмжээ ихээр зохион байгуулагдах болсон.

Тэгвэл Монгол улсын газар тариалангийн салбарт үнэтэй хувь нэмэр оруулахаар Agro Expo 2025 олон улсын үзэсгэлэн энэ оны 4 сарын 04-06-ны өдрүүдэд зохион байгуулагдах гэж байна.

Үүнтэй холбогдуулан тус арга хэмжээний мөнгөн ивээн тэтгэгч “Энсада Трактрон” компанийн гүйцэтгэх захирал Дамдиндорж ОРГИЛ-той ярилцлаа.

 

-Танд энэ өдрийн мэндийг хүргэе. Юун түрүүнд компанийн үйл ажиллагааны талаарх мэдээллийг бидэнд өгөхгүй юу?

- Сайн байна уу, юуны өмнө Монголын нийт тариаланчид болон ХАА-н салбарын бүхий л хамтран зүтгэгч нартаа энэ өдрийн мэндийг хүргэе.

Манай компани нь 2010 онд Канад улсын хөрс хамгаалах тэг технологийн үрлэгч болон бусад дэвшилтэт техникийг Монголын тариаланчдад нийлүүлэх зорилгоор дэлхийн алдарт Case IH болон New Holland брэндийн Монгол улс дахь албан ёсны дистрибьютор болон үүсгэн байгуулагдаж өдгөө 15 дахь жилдээ үйл ажиллагаагаа явуулж байгаа ба манай компанийн нийлүүлсэн хөрс хамгаалах тэг технологи бүхий үрлэгч нь Монгол улсын нийт тариалалтын 30 орчим хувийг гүйцэтгэж байна.

Үүнээс гадна бид Канад улсын Bourgault, Seedmaster, MacDon, Италийн AGI, Maschio Gaspardo, Францийн Greigore Besson, Нидерландын Trimble, Финландын Farmcomp, АНУ-ын J&M зэрэг ХАА-н тоног төхөөрөмжийн үйлдвэрлэл, технологи, инновацаар дэлхийд тэргүүлэгч 40 гаруй брэндийн албан ёсны дистрибьютор болсон байна. Бид зөвхөн техник нийлүүлээд зогсохгүй баталгаат сэлбэг хэрэгслээр хангаж, засвар үйлчилгээ, зөвлөгөөг тогтмол үзүүлэн хэрэглэгчдийнхээ үр ашгийг нэмэгдүүлэх, тасалдалгүй ажиллагааг хангахад анхааран ажиллаж байна.

Үүнээс гадна бид 2022 оноос ХАА-д ашиглагдах бордоо, ургамал хамгааллын бодисыг мэргэжлийн зөвлөх үйлчилгээ, талбайн үзлэг зөвлөгөө, төлбөрийн уян хатан нөхцөлтэйгөөр нийлүүлэн бордоо үйлдвэрлэлээр ОХУ №1 үйлдвэр болох Фосагро, БНХАУ-ын ургамал хамгааллын бодисын тэргүүлэгч үйлдвэрлэгч Pioneer брэндтэй хамтран ажиллаж байна.

- Agro Expo үзэсгэлэнд 2 дахь удаагаа ивээн тэтгэгч байгууллагаар оролцох гэж байна. Үзэсгэлэнгийн үеэр ямар бүтээгдэхүүн танилцуулах вэ?

- Энэ удаагийн Agro Expo үзэсгэлэнд бид өөрсдийн нийлүүлдэг бүтээгдэхүүн үйлчилгээ, техник тоног төхөөрөмжийг танилцуулан оролцох ба онцлох техникийн хувьд АНУ-ын Case IH брэндийн AF6160 загварын комбайныг онцлох болно.

Тус комбайн нь автомат жолоодлогын систем, чийг хэмжигч, ургац тодорхойлогч, зайнаас хянах систем болон Монголд цор ганц X flow шигших систем зэргээр тоноглогдсон том оврын комбайн юм. Тус комбайн болон бусад манай бүтээгдэхүүн үйлчилгээтэй танилцахыг хүсвэл 04 сарын 04-06 өдрүүдэд Буянт Ухаа спорт цогцолборт хүрэлцэн ирж илүү дэлгэрэнгүй мэдээллийг авах боломжтой.

 

- Газар тариалангийн чиглэлийн үзэсгэлэн өөр оронд хэр их зохион байгуулагддаг вэ. Манай орны нөхцөлд Agro Expo 2025 үзэсгэлэнгийн цар хүрээг хэрхэн харж байна?

- Бид жил бүр Канад, Герман, БНХАУ-д зохион байгуулагддаг ХАА-н үзэсгэлэнд хэрэглэгчдийн хамтаар тогтмол оролцож олон улсын ХАА-н салбарын чиг хандлага, техник технологийн хөгжилтэй цаг алдалгүй танилцаж Монгол улсад нэвтрүүлэх, нутагшуулахыг хичээж байдаг.

Монголын ХАА-н салбар өөрсдийн гэсэн үзэсгэлэнтэй болж хэрэглэгчид бүхий л брэндийн тоног төхөөрөмж, ургамал хамгааллын бодис, бордоо зэрэг бүтээгдэхүүнүүдтэй 1 дор танилцах боломж олдож байгаад баяртай байна. Мөн тус үзэсгэлэнд оролцогчдын тоо жилээс жилд нэмэгдэж байгаа нь энэхүү үзэсгэлэнгийн цар хүрээ хэр хэмжээнд нэмэгдэж байгааг харуулж байгаа байх.

- Улсын эдийн засгийг бүрдүүлэгч томоохон хүчин зүйлсийн нэг бол яах аргагүй хөдөө аж ахуйн салбар. Энэ салбарын бүхий л хэсгийг нэгтгэн үзэсгэлэн зохион байгуулж байгаа нь аль аль талдаа үр өгөөж өндөртэй гэж харж байна. Тэгвэл үзэсгэлэнгээр дамжуулан оролцогч байгууллагуудад төдийгүй Монгол улсад ямар давуу тал, боломжууд бий болох вэ?

- Салбарын бүхий л хэсгийг нэгтгэн үзэсгэлэн зохион байгуулж байгаа нь Монгол улсын засгийн газраас шинэхэн зарлаад буй ‘’Атрын дөрөвдүгээр аян’’ буюу Хөдөө аж ахуйн салбарыг цогцоор нь хөгжүүлэх зорилготой нийцэж байгаа. Тиймээс үзэсгэлэнд оролцогчид нь өөрсдийн үйл ажиллагаанаас бусад төрлийн ХАА-н бүтээгдэхүүн үйлчилгээтэй танилцах, туршлага солилцож үйл ажиллагааны чиглэлээ нэмэгдүүлэх боломж гарч байна гэж бодож байна.