Дэлхийн түүхэнд хамгийн удаан цаазын ялтай амьдарсан хүнд Японы шүүх хамгийн өндөр нөхөн төлбөр олгох шийдвэр гаргав

Бараг 50 жилийн турш цаазын ялтай хоригдсоны эцэст цагаатгагдсан хүнд Японы шүүх түүхэндээ байгаагүй өндөр нөхөн төлбөр олгох шийдвэр гаргажээ.

1968 онд өөрийн захирлыг гэргий, хоёр хүүхдийнх нь хамт хөнөөсөн хэрэгт шийтгүүлж байсан Ивао Хакамата дөнгөж өнгөрсөн онд цагаатгагдсан юм.

Одоо 89 настай Хакаматаг дэлхийн түүхэнд цаазын ялтай хамгийн удаан амьдарсан хүн гэж үздэг.

Японы шүүх түүний хохирлыг 217 сая иенээр ($1.45 сая) барагдуулах шийдвэрийг Даваа гарагт гаргасан байна.

Шийдвэрийг гаргасан шүүгч Күний Коши хохирогч нь 47 жилийн турш “сэтгэл санааны болон бие махбодын онцгой хүнд зовлон амссан” болохыг хүлээн зөвшөөрчээ.

Хакаматагийн нөхөн төлбөрийг Японы хэвлэлүүд тус улсын шүүхийн түүхэнд байгаагүй өндөр хэмжээ гэж мэдээлж байна.

Хакамата 2014 онд шоронгоос суллагдаж, хэргээ дахин шүүлгэхээр болж байжээ.

Гэхдээ сэтгэцийн эрүүл мэнд нь ихээр доройтсон тэрбээр бүх шүүх хуралд биечлэн оролцож чадаагүй юм.

Одоо Хакамата 91 настай эгч Хидекогийнхоо асрамжид амьдардаг.

Хидеко олон арван жилийн турш дүүгээ цагаатгуулахаар тэмцсэн хүн юм.

Хакаматаг 1966 онд Шизуока хотын мисо боловсруулах үйлдвэрт ажилладаг байхад захирал нь гэргий, хүүхдүүдийн хамт хутгалуулж алагдсан байдалтай шатсан гэрээсээ олдож байжээ.

Тухайн үед эрх баригчид түүнийг аллага үйлдэж, хохирогчдын гэрээс 200,000 иен хулгайлж, мөрөө баллахын тулд гэрийг нь шатаасан хэрэгт буруутгасан байна.

Эхэндээ Хакамата хэргийг үйлдсэнээ няцааж байсан ч хатуу ширүүн байцаалтын улмаас эцэст нь хүчээр хүлээсэн гэдэг.

1968 онд тэр шүүхээс цаазын ял сонсож байжээ.

Хохирогчдын хувцаснаас илэрсэн ДНХ нь Хакаматагийнхтай таарахгүй байгааг өмгөөлөгчид нь сүүлд баталж байв.

Хэргийг дахин шүүх шийдвэр 2014 онд гарсан ч урт удаан үйл явцын улмаас өнгөрсөн оны аравдугаар сард л хурал нь эхэлж байжээ.

Эх сурвалж: BBC