Хоёрдугаар сарын 28 болон ирэх сарын 1, 2-нд нутгийн зүүн хэсгээр хүйтэн салхитай байна

Гэрэл зургийг MPA агентлагийн онцгой зөвшөөрөлтэйгөөр ашиглав

2025 оны хоёрдугаар сарын 24-нөөс гуравдугаар сарын 05-ныг хүртэлх 10 хоногийн цаг агаарын урьдчилсан төлвийг Цаг уур, орчны шинжилгээний газраас мэдээллээ. 

Хоёрдугаар сарын 28 болон гуравдугаар сарын 01, 02-нд нутгийн зүүн хэсгээр хүйтэн салхитай байх юм байна. 

Хур тунадас:

• Хоёрдугаар сарын 24-нд Хэнтийн уулархаг нутаг болон Хэрлэн, Онон, Улз голын хөндийгөөр,
• Хоёрдугаар сарын 27-нд Хөвсгөлийн уулархаг нутгаар,
• Хоёрдугаар сарын 28-нд Хангайн уулархаг нутгаар,
• Гуравдугаар сарын 01-нд Хангай, Хөвсгөл, Хэнтийн уулархаг нутгаар цас орж, зөөлөн цасан шуурга шуурна. 

Салхи:

Ихэнх хугацаанд говь, тал, хээрийн нутгаар секундэд 6-11 метр,

Хоёрдугаар сарын 24, 27-нд төв болон зүүн аймгуудын нутгаар секундэд 15-17 метр хүрч, нутгийн өмнөд хэсгээр шороон шуурга шуурна.  

Агаарын температур:

• Увс нуурын болон Дархадын хотгор, Завхан голын эх, Идэр, Тэс, Байдраг голын хөндийгөөр шөнөдөө -32...-37 градус, өдөртөө -19...-24 градус,
• Монгол-Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Хараа, Ерөө, Туул, Тэрэлж, Хэрлэн, Онон, Улз голын хөндийгөөр шөнөдөө -22...-27 градус, өдөртөө -9...-14 градус,
• цас багатай энгэр ээвэр газар болон говийн бүс нутгийн өмнөд хэсгээр шөнөдөө -5...-10 градус хүйтэн, өдөртөө +1...+6 градус дулаан,
• бусад нутгаар шөнөдөө -18...-23 градус, өдөртөө -3...-8 градус хүйтэн байна. 

Улаанбаатар хот орчмын 10 хоногийн цаг агаарын урьдчилсан төлөв 

Хур тунадас: Гуравдугаар сарын 01-нд ялимгүй цас орно. Бусад хугацаанд цас орохгүй.     

Салхи: Ихэнх хугацаанд секундэд 4-9 метр, 03 дугаар сарын 01-нд баруун өмнөөс баруун хойш эргэж секундэд 8-13 метр хүрч ширүүснэ.  

Агаарын температур: Шөнөдөө -18...-23 градус, өдөртөө -3...-8 градус хүйтэн байна.