Гэрэл зургийг MPA агентлагийн онцгой зөвшөөрөлтэйгөөр ашиглав

Монгол Улсын гавьяат тамирчин Ц.Шаравжамц АНУ-ын Чикаго хотод байрлах "Монгол авьяас" академитай хамтран хүүхдийн шигшээ баг бүрдүүлж АНУ-ын AAU хүүхдийн лигт оролцох талаар өнөөдөр сэтгүүлчдэд мэдээлэл хийлээ.

Энэ талаар Ц.Шаравжамц "Манай улсаас өсвөрийн сагсан бөмбөгийн баг АНУ-ын өсвөрийн зуны лиг буюу AAU лигт оролцохоор төлөвлөж байна. Өмнө нь Ш.Энхийн-Од тэргүүтэй ганц нэг тамирчид энэ лигт тоглож байсан. Гэхдээ баг олж авахад хүндрэлтэй байдаг.

AAU бол АНУ-ын сургуулийн сурагчдыг цуглуулаад нэг баг болж өрсөлддөг лиг. Хавар, зун үргэлжилдэг энэ лигт авьяаслаг тоглогчдыг агентуудын нүдэнд өртүүлэх, холбоо тогтоох үндсэн зорилготой. 

"Монгол авьяас" академи бол АНУ дахь бүх үйл ажиллагааг хариуцна. Харин Монгол дахь хүүхдүүдийг сонгон шалгаруулах ажлыг "Старс" академи зохион байгуулна.

Энэ жилийн хувьд 18-аас 19 насны хүүхдүүдийг авч явахаар төлөвлөсөн. Учир нь энэ сонгон шалгаруулалт цаашид жил бүр уламжлал болох юм. Тиймээс одоо 19 хүрч байгаа хүүхдүүдэд боломж өгөхөөр шийдвэрлэсэн.

Бидний гол зорилго бол өндөр түвшний хүүхдүүдтэй өрсөлдөх тул дөрвөн насны тус бүр 10 тамирчинтай баг бүрдүүлэх тооцоотой байна.

Сонгогдсон хүүхдүүд бүтэн сар АНУ-д амьдрах тул үүнийг дагаад маш их зардал гарна. Нэг хүүхдийн зардал нь ойролцоогоор $6,000 - $7,000 болох юм. Тиймээс авьяаслаг хүүхдүүдэд санхүүгийн тал дээр асуудал гарч болзошгүй тул хамтран ажиллахыг компани, хувь хүмүүст уриалж байна.

Олон хүнийг визэд хамруулах тул сонгон шалгаруулалтыг нэг сардаа багтаахаар төлөвлөж байна. Сонгогдсон тамирчдын виз зэрэг бичиг баримтын асуудлыг "Монгол авьяас" академи хариуцах тул сонгон шалгаруулалтад 100 хувь анхаарч, эцэг эх нь ч бас хүүхдүүдээ дэмжээрэй гэж хэлье" гэв. 

"Дөрвөн насны тус бүр 10 хүний бүрэлдэхүүнтэй баг бүрдүүлнэ"

 

Гэрэл зургийг MPA агентлагийн онцгой зөвшөөрөлтэйгөөр ашиглав

Сонгон шалгаруулалтын талаар "Старс" академийн менежер Ш.Мөнхийн-Од "Сонгон шалгаруулалт энэ сарын 14-ны өдөр буюу дараа долоо хоногийн Мягмар гарагт өглөөний 09:00 цагаас өдрийн 17:00 цаг хүртэл үргэлжилнэ. 

Насны хувьд

• 09:00 - 11:00 цаг хүртэл 18-аас 19 нас,
• 11:00 - 13:00 цаг хүртэл U17 нас,
• 13:00 - 15:00 цагт U16 нас,
• 15:00 - 17:00 цагт U15 насны хүүхдүүдийг бүртгэнэ.

Сонгон шалгаруулалтыг "NBA Combine" дасгалыг хэрхэн хийж байгаагаар суурилаад дараа нь хооронд нь тоглуулаад тэндээс сонгогдох болно. Бэлтгэлийг амралтын өдрүүдээр "Аса арена"-д хийхээр төлөвлөж байгаа ч одоогоор 100 хувь тодорхой болоогүй байна.

AUU-гийн тэмцээн ирэх тавдугаар сарын 1-нээс 31-ныг дуустал үргэлжилнэ. Тэр хүртэл сонгогдсон хүүхдүүдийг бэлтгэлээр хангахаар төлөвлөж байна" гэж онцоллоо.