Соёл урлагийн их сургууль Зэвсэгт хүчний жанжин штабтай хамтран ажиллахаар болжээ

Соёл урлагийн их сургууль/СУИС/-ийн ректор Э.Сонинтогос, Зэвсэгт хүчний жанжин штаб/ЗХЖШ/-ын орлогч дарга бригадын генерал Б.Баатар нар 2024 оны арванхоёрдугаар сарын 17-ны өдөр хоёр байгууллагын хамтран ажиллах санамж бичигт гарын үсэг зуржээ. 

Энэхүү санамж бичгийг байгуулснаар ЗХЖШ, Төрлийн цэргийн командлал, удирдах газар, нэгтгэл, ангиудын бие бүрэлдэхүүнтэй Соёл урлагийн их сургуулийн эрдэмтэн судлаачид, оюутан залуучууд олон чиглэлээр хамтран ажиллах юм байна.

Хамтын ажиллагааны талаар СУИС-ын албан ёсны пэйжид "Цэрэг дайчид болон оюутан залуусын эх оронч үзлийг төлөвшүүлэх, Монголчуудын эрхэмлэн дээдлэх үнэт зүйлсийг сурталчлан таниулах, түүх, соёлоороо бахархах, ёс суртахуунтай иргэн болгон төлөвшүүлэхэд чиглэгдэнэ" хэмээсэн байна.