С.Одонтуяа: Цахилгаан автомашиныг татваргүй болгох асуудлыг УИХ-аар шийдүүлэх зэргийг үндэсний хороо дэмжиж ажиллана
Засгийн газрын ээлжит хуралдаан өнөөдөр боллоо. Хуралдаанаас гарсан шийдвэрийн салбар хариуцсан сайдууд танилцуулав.
Байгаль орчин, уур амьсгалын өөрчлөлтийн сайд С.Одонтуяа "2023 онд татан буугдсан Орчны бохирдлыг бууруулах үндэсний хороог дахин байгуулах шийдвэр гарлаа.
Агаарын бохирдлыг бууруулахад ойрын хугацаанд ямар ажил хийх, дунд болон урт хугацаанд ямар ажил хийх талаар уг үндэсний хороо төлөвлөгөө гаргана. Мөн Орчны бохирдлыг бууруулах үндэсний хороо нь Улсын Их Хурал(УИХ) болон бусад салбар яам, нийслэл, аймаг, дүүрэгтэй салшгүй холбоотой хамтарч ажиллах юм.
Нийслэл бүх асуудлаа өөрсдөө хариуцаад, шийдээд явна. Яамд нь үндэсний хорооны үйл ажиллагааг дэмжин тусалж ажиллана.
Үндэсний хороо нь ойрын үед хэд хэдэн ажил хийхээр төлөвлөж байгаа:
- Ард иргэдэд үнэн зөв, бодит мэдээллийг тогтмол ойлгомжтой хүргэх. Зарим хүн хэмжилт буруу эсвэл хэмжилтүүдийг дарж гаргаад байгаа юм биш үү гэх эргэлзээнүүд бий. Иймд ямар стандартаар хэмждэг вэ, үүнийг нь хувь хүн өөрчлөх боломжтой юу үгүй юу гэх зэрэг асуудлаар маргааш 11:00 цагт хурал хийж, танилцуулна.
- Сайжруулсан түлшний дараагийн шилжилтийг хийх талаар ажиллана.
- Автомашины утаа агаарын бохирдлын нэлээд хувийг эзэлж байгаа тул эхний ээлжид нийтийн тээврийн 1,191 автобусыг евро-5 стандартад шилжүүлсэн. Тэгвэл өнөөдрийн хуралдаанаар төрийн байгууллагын 2,000 гаруй автомашиныг евро-5 стандартын түлшинд шилжүүлэх үүрэг өгөгдсөн" гэв.
Шууд үзэх:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
